Эссизликни бла кесине базыныулукъну ахыры – жарсыу

Бу кюнледе РФ-ни МЧС-ини КъМР-де Баш управлениясында жай жууунуу кезиуню эсеплерин чыгъарып, аны жабылгъаныны юсюнден билдиргендиле. Озгъан жазда республикада 9 пляж бла 4 база (къайыкъла орналгъан жерле) ишлегендиле. Кёлледе къуллукъларын бардыргъан битеу къутхарыучула борчларын толтуруугъа сюелирден алгъа юйрениу курсланы ётюп, тийишли къагъытла алгъан эдиле.

Биринчи октябрьге дери республикада кёлледе бла черекледе 6 адам ёлгендиле. Ала барысы да суугъа кирирге эркин этилмеген жерледе батхандыла, деп айтылады билдириуде. Баш управленияны специалистлери саулай да 63 кере тинтиулеге чыкъгъандыла. Объектледе халгъа контроль этиу белгиленнген жорукъла бла тийишлиликде ётгендиле. Июнь-август айлада бу ишлеге аслам эс бёлюннгенди. Жер-жерли самоуправленияны, ич ишле органланы келечилери бла къутхарыучула жууунургъа Андан тышында да, сабий солуу лагерьледе эм билим бериу учреждениялада да тюбешиуле ётгендиле. Алагъа 1800 чакълы адам къатышханды. Хайырлы информация бла буклетле юлешиннгендиле.

Жарсыулу шартланы тинтиу кёргюзтгеннге кёре, битеу ишни башы адамланы уллу кёллюлюклериндеди. Эркин этилмеген кёлледе бла черекледе жууунуу къоркъуусуз болмагъанын кёпле ангыларгъа да сюймейдиле. Кеслерине керексиз базыныуну ахыры уа ёлюм бла бошалады.

   Ата-анала да  суу жагъалада сабийлерине тийишли эс бёлмегенлерин  специалистле бек уллу жарсыуладан бирича белгилегендиле.