Тутушууда эм кючлюле – Черек районну келечилери

«Спартак» стадионда Кавказны халкъларыны маданият эм спорт фестивальларыны республикалы кезиую болгъанды. Анга Нальчик эм Прохладный шахарладан, Элбрус, Урван, Терк, Черек, Чегем, Май, Лескен, Зольск  эм Прохладна районладан командала – битеу да 400-ден аслам адам - къатышхандыла. Алагъа кирген спортчула уа ары дери оюнланы жер-жерли кезиуюнде хорлагъандыла. Республикалы кезиуде къытханладан Къабарты-Малкъарны жыйымдыкъ командасы къуралырыкъды, ол артда республиканы атындан фестивальны ахыр кезиуюне барлыкъды. Быйыл «Кавказ оюнла» онунчу кере ётдюрюледиле.

Черек районну администрациясыны башчысыны орунбасары Улбашланы Сахадин аланы командалары эришиулени битеу тюрлюлеринде сынашырыкъларын билдиргенди. «Бу фестиваль спортну, шуёхлукъну байрамыды. Бизни командабыз эришиуге хазырды, спортчулабырыз алчы жерлеге чыгъарларына ышанама. Районубузда физкультура, спорт бла кюрешмеген хазна адам жокъду – жангыз да спорт школлагъа 1500-ге жууукъ сабий жюрюйдюле, клубла ишлейдиле. Спорт адамланы жууукълашдырады, кючлейди, халлерине огъурлулукъ береди. Къарыулу адам а осал жолгъа сюелирик тюйюлдю, огъурсузлукъдан кери турлукъду», - дегенди ол. 

Эришиуле спортну талай тюрлюсюнден бардырылгъандыла: бел бауладан тутуп тутушуу, армрестлинг, гитче футбол, садакъдан атдырыу, кюч троеборье, ауурлукъну кётюрюу, эстафета, къанатны тартыу эм анга ёрлеу, агъач аякълагъа минип чабыу, жюкню ташыу. 

Черек районну келечилери эм кючлю бел бауладан тутуп тутушуудан болгъандыла – ала битеу ауурлукъ къауумлада биринчи жерлени алгъандыла. Алай бла тюбешиулерин хорлам бла Улбашланы Мартин, Мокъаланы Расул, Мисостланы Мурзабек бошагъандыла. Таякъ аякълада жюрюуде къаршчы спортчуланы Бёзюланы Элдар озгъанды. Гитче футболда уа черекчиле ючюнчюле болгъандыла. 

Суратда: Черек районну командасы.