Шуёхлукъну бла халкъыны жырчысы

Белгили чеченли поэт Асламбек Абдулаев бла бизни Махийланы Азиза шагъырейлендиреди. Аны тизгинлери хар окъуучуну да жюреклерине жол таба эдиле. Ата журтха бла халкъына сюймеклик, миллетлени араларында къарындашлыкъ, кертичилик, таматалагъа сый бериу, мамыр жашау къураугъа итиниулюк дегенча эрттеден келген темала аны назмуларында аламат ачыкъланыпдыла.

 

              Аппаларымдан иги мен да болалмам,

              Аладан жигит да болалмам!

              Тыш жерле жылы да, иги да болурла,

              Алай къайдан да Ата журтумду багъалы…

Чеченнге эм халкъына сюймеклиги уа Асламбек Абдулаевни битеу чыгъармачылыгъы бла ётеди.

Поэтни Нальчикде да  кёпле таныйдыла. Гуманитар тинтиулени институтунда аны окъуучула бла тюбешиулери да ётгендиле. Тенглери да  аз тюйюлдюле мында. Малкъарлыла бла уа аны сюргю бирикдиреди. Профессор Эфендиланы Салих бла ала энчи шуёхлукъ жюрютгендиле. Назмучуну «Эльбрус», «Эфендиланы Салиххе» деген тизгинлери да окъуучуну жюрегине жол тапхандыла дерге боллукъбуз.

 

   Ма Эфенди улуна жоралагъан назмусундан юзюк:

…Вождём спроваженный из дома,

    В степях он горы рисовал.

    Влача изгнанье, встретил Тому,

   Небесный дар с душой принял.

 

   Вернувшись к родины истокам,

   Своей рукой судьбу ровнял.

   Он для студентов стал пророком,

   Мудрец, философ, аксакал.

 

Хар сёзюнде ол туугъан тауларына кертичилей къалгъанын ачыкълайды. Аны фахмулугъуна бийик багъа бичедиле. Сёз ючюн «Гражданское общество» деген жамауат организация аны «Россейни халкъ поэти» деген атха тийишли кёргенди.

Бюгюннгю жашаудан да кенгде тюйюлдю ол. Россейни жан-жанындан жаула онгун алыргъа кюрешгенлери да Асламбекни бек жарсытады. «Дуниягъа оноу этерге кюрешгенле бизни адет-тёрелерибизге, маданиятыбызгъа да кеслерин сугъаргъа излегенлери осалды. Халкъланы араларында къаугъа къозгъаргъа излегенлени да жолларын кесерге керекбиз. Бизни халкъ кёп урушладан бла къыйынлыкъладан къутулгъанды», -дейди назмучу.

Шёндю назмучу Москвада жашайды и ишлейди. Бир къауум жыл алгъа  Руслан Бакриев бла бирге «Чеченцы: от третьего лица» деген китапны басмалагъандыла. Ол ёз халкъларыны тарыхына, маданиятына, динине, адет-тёрелерине эм белгили адамларына жораланнганды.  Алай бла ол миллетини келечилерини юслеринден не къадар кёп адам билсе сюеди.

Мында бизде Миллет библиотекада да аны оннга жууукъ назму китаплары бардыла.

Поделиться: