«Мектепни тамбласын жангы амалла эмда технологияла бла байлайма»

28 августа, 2019 - 09:00
Элбрус районну Терс-Къол элини орта школуну технологиядан педагогу Шауаланы Лейля билим  бериуде алай кёп ишлемеген эсе да, жангычылыгъы бла, сейир амалланы къурай билгени бла айырмалыды. Биз аны бла окъутууну, башха  затланы юслеринден да ушакъ этгенбиз.
 
-Лейля Ахматовна, Терс-Къол узакъ эллерибизден бириди. Билим бериуде кюн сайын тюрлениуле бола  тургъан заманда школугъузда окъутуу не халдады?
 
-Элибиз уллу тюйюлдю, биле болурсуз. Мектебибизни юсюнден айтсакъ, аны мекямы эскиди. Былтыр анга алтмыш жыл толгъанды. Алай эсе да, сабийлеге тийишли билим берирча онгларыбыз бардыла. Окъуучуларыбызны санына кёре, ала уа жюзден аз артыгъыракъдыла, кабинетлерибизде шёндюгюлю технологияла да бизге тамамдыла.
 
Мында гитчелени патриотлукъ спорт жаны бла юйретиуге да аслам эс бурулады. Хар предметден устазларыбыз да жетишедиле. Ала барысы да жангы амалланы хайырланып ишлейдиле.  Жууукъ заманда  жангы  мектеп сюелликди деп ышандыргъандыла да, ахшы умутларыбыз бла сакълайбыз.
 
-Сен «Устазны жылы – 2018» Битеуроссей профессионал  конкурсну республикалы кесегине къатышханладан бирисе. Не бередиле быллай тюбешиуле?
 
-Мен  бу мектепни тауусханма. Кесими окъутханланы биргелерине ишлейме. Эришиуге барыргъа директорубуз Залийханланы Лейля, устазла Байдаланы Кулина бла Рита, Наталия Шумляева кёллендиргендиле эм аслам затха тюшюндюргендиле, сау болсунла.
 
Конкурс тынч эди деп айталлыкъ  тюйюлме. Билесиз, аны регион кезиуюне тюшер ючюн,  районда биринчи жерге чыгъаргъа керекди. Айхай да,  ол жетишимге къууаннганма. Нальчикде  уа  сынамлыракъ, менден асламыракъ ишлегенле бла тюбеширге да тюшгенди. Ким биледи, биз барыбыз да школда тенг урунсакъ, башхаракъ да кёрюнюр эди.
 
Алай эсе да, билемисиз, быллай конкурсла уллу сынамдыла.  Къаллай бир затха юйренесе анда! Ишингде хайырланалырча аслам жангы затны  эсинге жыйышдыраса. Аллай эришиулени къыйынлыгъы манга эм алгъа сахнагъа чыгъаргъа, микрофон тутаргъа керек болгъанындады. Ийменчеклигим да чырмагъан болур, алай  а ючюнчю жерни алгъаныма ыразыма.
 
-Сен технологиядан дерсле бересе. Бу предмет аслам заманны бир-бир мектепледе окъутулмай тургъанды. Не айталлыкъса аны юсюнден?
 
-Кертиди. Алай да болгъанды. Аны берилмегенин тюз кёрмейме. Насыпха,  бизде аллай зат этилмегенди. Технология жашауда бек керекди. Къызчыкълагъа, жашчыкълагъа болсун, башха тюйюлдю. Ала юйде этерге керекли бир бош затны окъуна билмей турсала, ол къалайды?!
 
Кеслерине ийнанмагъан, хунерим жокъду деген сабийле кёпдюле. Бир- бирде  аланы   ата-аналары окъуна билмейдиле ол къаллай бир затха уста болгъанын. Аны себепли уа школчуну кёллендире, аны кёзчюклери жанарча  да эте билирге керекди.
 
-Шёндю ФГОС-лагъа тийишлиликде дерследен тышында ишге, къошакъ билим бериуге аслам эс бурулады. Сизде уа ол къалай къуралгъанды?
 
-Жангы стандартланы бек  жаратама. Мен жаланда технологиядан угъай , сурат ишлеуден, информатикадан, искусстводан да окъутама. Аны себепли ФГОС-ла  сабийлени кеслери алларына оюмларгъа юйретедиле деп толусунлай айталлыкъма.
 
Дерследен тышында «Хунерли къолчукъла» деген кружокну да къурагъанма. Ары жыл сайын отуз чакълы школчу жюрюйдю. Алгъаракъда, аланы ишлеринден бир ненчасын  жыйышдырып, «Золотые огни-18» деген Халкъла аралы эм «Золотые руки» деген Битеуроссей заочный конкурслагъа Интернет бла жибергенме. Экисинден да ючюшер алчы жерлени алып къууаннганбыз.
 
Окъуу жылны ахырында уа этген затларыбыздан уллу кёрмюч къураучума. Аны ата-анала да жаратадыла. Мектебибиз ачылгъанлы биринчи кюнден бери да мында ишлеген Сергей Силин ахшы тёре къурагъан эди.  Биз  да, аны андан ары бардыра, школну  тауусханлагъа агъачдан ариу жасалгъан ачхычла хазырлап беребиз.
 
-Бусагъатдагъы школну айныуун неде кёресе?
 
-Жангы амаллада, технологиялада. Андан сора да,  педагогла ата-анала бла байламлыкъда ишлерге керекдиле.
 
-Устаз-ол усталыкъмыды огъесе адамны жюрек излемимиди?
 
-Ачыгъын айтайым, манга ол жюрек излемди.  Сабийлени сюймеген мектепде не хазна ишлеяллыкъды. Ала гитчеле эселе да, жюреклери ачыкъды, алдаяллыкъ тюйюлсе.
 
Педагог болгъанымда атамы юлгюсю уллуду. Ол ДЮСШ-да тау
Лыжаладан  тренер болуп тургъанды, артда уа мен ишлеген школгъа аслам жылны таматалыкъ этгенди.
 
-Аллай бир хунерни иеси болгъан тиширыуну бош заманы уа боламыды?
 
-Аз эсе да, аны юйюр тёрелеге жораларгъа сюйюучюме. Айтханым, тау лыжалада учаргъа.
 
-Биз билгенликден, насыплы анаса. Къызчыгъынгы уа къалай юйретесе?
 
-Лаура манга ушамайды. Ол бегирек илмугъа тартылады. Алыкъа тёртюнчю классха барлыкъды, заман кёргюзтюр нени сайларыгъын. Алай эсе да, беш жылындан бери  тау лыжалада учады. Бюгюнлюкде ол жаны бла ДЮСШ-да эгечим Зухураны къолунда юйренеди.
Ушакъны Мокъаланы Зухура бардыргъанды.
  • 33 просмотра
Поделиться: