Артмакъ ахча

Чам халда

Шахарда троллейбус ызны кетергенлей кетдиле пассажирлени ташыучуланы юйюрлери Санкт-Петербургга.  Юйню иеси мында фатарны сакълап къалды. Аны жашы Аскер бла аны анасы татлыхан, кеслери айтыучулай, Ленинградха атландыла. Анда троллейбусла, ала «мюйюзлерин» илиндирирча чыбыкъла болгъанларын да билип баргъан кибик, шахарны бир къыйырына жюрюген троллейбусну жюрютюп башлады жаш, анасы да ол маршрутда контролёр.

Экономика саммит болгъан кюнледе Татлыхан жашы бла бирге ишлейдиле. Кече арасына дери кёп халкъны ташыдыла. Санкт-Петербургга келген, кетген да ол кюнледе кёп эдиле. Ишни бошагъандан сора троллейбусну ичине кёз жетдирген тёре барды. Татлыхан ишчи кюню бошалып, ол жумушну этмей къоймайды. Биреу бир тапсыз затны къоюп кетип, жашына сёз жетерин сюймейди таулу ана. Айтханыбызча, ишчи кюн бошалды, Татлыхан да шинтикге, аланы тюплерине да къарап тебиреди да, бир къара артмакъны тапды. Башын ачып къараса, долларладан бла евроладан толуп. Къайры эсе да бир къула тюзге ахча этейик деп кетип айланнганлагъа бу ахчаны да алыгъыз да, юйюгюзню табыгъыз» дегенча къоюлуп кетгеннге ушай эди бу хуржун. Аллай  бир ахчаны бир жолгъа кёрюп, къолунда тутуп тургъан тиширыу асыры абызырагъандан эрине сёлешди.

- Эй киши, артмакъ бла бир ахча тапханма, быллай бир къысым доллар, андан азырагъ а евро барды. Не этерге билмей, армаума.

- Мени санагъаныма кёре, бизни ахча бла 8-9 миллион сом болады, - деди эри Хажимет. – Ол ахча къолумда болса уа, къурулушу тохтап тургъан юйюбюзню да битдирир эдим. Не хадагъа этсин адам. Ол ахчаны да алып юйге айтмасагъыз а ыразы эдим.

- Ай къан жаусун, биреуню затын алып, менден къоранч болмай къаламы эди…

- Не болду, артмагъынгымы сыйыртдынг?

- Телефонуму тас этгенме да аны излеп кюрешеме…

-Къатын, терен башынг болмагъанын кесинг айтмасанг да билеме, алай бюгюнча бедишликге къалгъанынгы уа кёрмеген эдим. Телефонунгу тас этген эсенг, мени бла уа чарыгъынгы алыпмы сёлешесе?

- Бу ахчаланы къоюп кетгенни юйюне от тюшсюн, жарлы башымы сагъышха къалдырды эсе! Татлыхан BMW артмакъ бла бир ахчаны элтип таматасына берди. Ол да полицияны чакъырып, аланы къолуна берди. Ахчаны иеси ол ыйыкъда окъуна табылды. Алай Татлыханнга ыспас этип келген болмады. Ыспас эте билмеген санга доллар неда евро чулгъамнымы узатырыкъ эди?

Хар ингир сайын шинтиклени тюплерине кёз жетдирген къылыкъны къоймагъанды тиширыу. Энди ахчасын къоюп кетгенле  жокъдула ансы. Андан бери эки экономика саммит болду алай артмакъ бла бир ахча къоюп кетген чыкъмады.

 Хажимет къатынына «Бугъуннган миллионер» деген чам ат атагъанды, ол байлыгъын къайры чачаргъа билмей, иесиз итлеге ашарыкъ ала айланнган чюйютлюге ахчасын къайтаргъанына асыры ачыуу келгенден. Къаллай тиширыу бла жашау этерге кюрешгенин а хар ахча керекде эсине тюшюреди.