Себеплик волонтёрлагъа бла сакъатлагъа болушлукъгъа бурулупду

Россейни Къырал думасыны кюз арты сессиясы башланнганды. Къысха заманны ичинде  депутатла бир ненча магъаналы законну проектин сюзгендиле. Бюгюн а волонтёр къымылдаугъа къаллай болушлукъ этиллигини бла саулукъларына кёре чекленнген онглары болгъан инсанлагъа реабилитацияны системасыны юслеринден законланы проектлерини энчиликлерин ангылатыргъа сюебиз.

Керексиз чеклени кетериуге бурулупду

Ахыр кезиуде волонтёр къымылдауну жамауат жашауда магъанасы ёсгенлей барады. Аны эсге алып, ишлерини хайырлылыкъларын игилендириуге бурулгъан законла жарашдырыладыла. РФ-ни Къырал думасыны депутатлары волонтёрлагъа къошакъ себеплик жаны бла документни сюзюп, биринчи окъулууда къабыл кёргендиле. 

Аны жарашдыргъанладан бири Жаш тёлю политика жаны бла комитетни башчысы Артём Метелев айтханыча, документ волонтёр къымылдаугъа федерал арада эм регионлада болушлукъну тутхучлу системасын къураугъа бурулупду.

- Волонтёрлагъа артыкъ излемле салыргъа керекмейди. Аланы больницалагъа, социал объектлеге чырмаусуз кирирге онглары болургъа тийишлиди. Закон а бу кемчиликни кетериуге бурулупду. Аны бла бирге къыралда добровольчество къымылдауну айнытыугъа бурулгъан мадарла бардыла. Хар регионда да ол жаны бла арала ачыллыкъдыла, власть органла уа алагъа болушлукъну мадарларын толтурургъа керекдиле,-дегенди депутат.

Андан сора да, документге тийишлиликде, волонтёрлагъа кёкюрекде жюрютюлген белги жарашдырыллыкъды, къанны бериу бла кюрешгенледеча. Вузгъа кирген кезиуде уа бу къымылдауда сынаугъа эс буруллукъду.

Граждан обществону айнытыу, жамауат эм дин биригиулени ишлери жаны бла комитетни башчысы Ольга Тимофеева айтханча, законну проекти къысха заманны ичинде сюзюллюкдю. «Россейни Президентини волонтёрлагъа себепликни юсюнден буйрукълары бардыла.  Бу соруу артыкъда магъаналы болгъанын барыбыз да ангылайбыз, бютюнда шёндюгю заманда. Аны себепли правительстводан жангы жорукъланы къысха заманны ичинде тинтирлерин тилейбиз,   законну заманны тас этмей къабыл кёрюрча.  Керексиз чеклени кетерип, волонтёр къымылдауну ишин тирилтирге тийишлиди»,-деп къошханды депутат.

Таматалагъа, сабийлеге да керекли жумушла

Дагъыда къыралда сакъатланы реабилитациясыны системасын къурау жаны бла мадарла толтуруллукъдула. Кырал Думаны башчысы Вячеслав Володин айтханыча, ол жаны бла  законну проекти таматаланы, сабийлени да саулукъларын игилендириуге бурулупду. Аны онглары бла 11 миллиондан аслам адам хайырланаллыкъды.

«РФ-ни сакъатланы реабилитациясыны эмда битеулю реабилитацияны юсюнден бир-бир законлагъа тюзетиуле кийириуню юсюнден» законну проектин депутатла биринчи окъулууда къабыл кёргендиле. Къыралда сакъатланы саулукъларын игилендириу жаны бла бирикдирилген низам боллукъду: социал-психология, медицина болушлукъдан башлап  саулукъларына кёре чекленнген онглары болгъанланы усталыкъгъа юйретиуге дери. Документге тийишлиликде, бу жаны бла мадарла сабийлеге да бурулупдула. «Саулукъларында кемчиликлери болгъан юч жылгъа дери сабийлеге бла аланы юйюрлерине себеплик реабилитацияны энчи бёлюмюне биринчи кере болуп чыгъарылгъанды»,-деп белгилегенди Вячеслав  Володин, законну юсюнден айта.

Алай бла уа къыралда чекленнген онглары болгъан 11 миллиондан аслам адамны бла 730 минг  сакъат сабийни жашау болумлары игилендирилликди. Закон къыралны ичинде реабилитация жаны бла болумланы бир низамгъа келтирликди.  Медицина болушлукъ бла бирге уа саулукълары къыйнагъан инсанланы жашау болумларына, усталыкъгъа юйретиуге, солуу заманларын къураугъа энчи эс буруллукъду.