Жолда бузукълукъла ючюн жууаплылыкъ къатыланнганды

Жолда жюрюуню жорукъларына бузукълукъла ючюн жууаплылыкъны къатыландырыугъа бурулгъан праволу актла къабыл кёрюлгендиле. Ол санда машинаны жюрютюрге энчи эркинликлери болмай, руль артына олтургъанлагъа да. 2022 жылда 14 июльда чыгъарылгъан 258-ФЗ номерли закон РФ-ни Уголовный кодексини 31-чи эм 150-чи статьяларына тюрлениуле кийиргенди.

 Алай бла машинаны жюрютюрге правалары болмай, бир кере административ неда уголовный жууапха тартылгъан инсан, бу бузукълукъну къайтарып этсе, жууаплылыкъ къатыланады. Сёзге, ол алгъын административ жууапха тартылгъан эсе, анга тазир 100-150 минг сомгъа жетеди. Аны эркинлиги бир жылгъа сыйырылыргъа да боллукъду.

Алай белгиленнген бузукълукъ ючюн уголовный жууапха тартылып, аны жангыдан къайтаргъан инсаннга уа тазирни ёлчеми эки кереге кёбейтиледи – 200-300 минг сом. Бу кезиуде эркинлик юч жылгъа дери сыйырылыргъа да болады.  Андан сора да, машинасыз къалыргъа къоркъуу барды.  

  РФ-ни УК-сыны 264.1-чи статьясында кеф водительлеге жууаплылыкъ белгиленипди. Анда да эсирип, жолда тутулгъан инсанны машинасы сыйырылыргъа боллугъу айтылады - ол бузукълукъ ючюн алгъын административ жууапха тартылгъан эсе. 

Жолда жюрюуню жорукъларына бузукълукъ этип, адамны саулугъуна ауур заран салгъанда неда адам ауушханда правалары болмагъан водительлеге жууаплылыкъ къатыланнганын да айтырчады.

Андан сора да, водительни кеф болгъанын бла къалгъанын тохташдырыр ючюн медицина тинтиулени низамында да бардыла жангычылыкъла. РФ-ни Правительствосуну «Аракъыдан эсиргенин тохташдырыуну эмда аны эсеплерин жарашдырыуну, инсанны эсиргенин ачыкъларгъа медицина тинтиулеге ашырыуну низамларыны юслеринден» 1882-чи номерли бегиминде белгиленипди. Анга кёре, быйыл 1 мартдан водительни кеф болгъанын ачыкълаугъа бурулгъан медицина тинтиулени бардырыуну жангы низамы ишлеп башларыкъды.

Сёзге, тинтиулени башлардан алгъа жууаплы къуллукъчу ала къалай къураллыкъларын, къаллай приборла хайырланыллыкъларын ангылатыргъа керекди. Жангы жорукълагъа кёре, тинтиуле эки шагъатны къатында бардырыладыла неда ол видеогъа алдырылады.  

 Адамны солууунда хауаны бир литрине 0,16 мг уулу зат болгъанын кёргюзтсе энчи прибор, алай водитель эсеплени терсликлерин айтса, аны медицина учреждениягъа жетдиредиле. Водитель тинтиуледен ётерге унамагъан кезиуде да ашырылады медицина учреждениягъа.

Тикаланы Фатима хазырлагъанды.
Поделиться: