Ток урларгъа тюзелгенле тутулгъандыла

Быйыл ал сегиз айны ичинде бизни республикада электрокючню хакъ тёлемей хайырланыу жаны бла 169 шарт тохташдырылгъанды. «Каббалкэнерго» предприятияны пресс-службасындан билдиргенлерине кёре, къоранчла 48 миллион сомгъа жетгендиле.

Шартланы асламысы (145) электрокючню эсеплемей хайырланыу бла байламлыдыла. Ол 35 миллион сом болгъанды. Энтта да 24 инсан а ток ызлагъа, соргъан-сурагъан этмей къошулуп, аны онюч миллион сом багъасы урлагъандыла.

Бузукълукъ этгенлени барына да актла жазып, ишлерин право низамны сакълаучу  органлагъа жибергендиле. «Быллай адамланы хатасындан электрокюч сетьлени иши тапсыз болады, оборудование бузулады, ток бла жалчытыу да осалына кетеди. Аны ючюн бузукълукъланы ачыкълаугъа биз энчи эс бурабыз», - дегенди «Каббалкэнергону» башчысы Муртаз Каров.

Электрокючню урлау ючюн административ эмда уголовный жууаплылыкъ сакълагъанын «Россети Шимал Кавказ» компанияда да белгилейдиле. КоАП-ны 7.19 статьясына тийишлиликде, ток ызлагъа соргъан-сурагъан этмей къошулгъанлагъа эмда электрокючню урлагъан инсанлагъа 10-15 минг сом тазир салынырыкъды. Аны предприятие неда организация этген эсе уа – 100-200 минг сом тёлерикди. Иш уллугъа кетсе, уголовный жууаплылыкъ боллукъду.