Токсуз къалмаз ючюн тёлеулерин берирге ашыкъгъандыла

 Бизни республикада быйыл жети айны ичинде ток ючюн тёлемей тургъан 23,2 минг адамны эмда предприятияланы бла организацияланы ансыз къояргъа умут этген эдиле «Каббалкэнергода». Андан билдиргенлерине кёре, бу абонентлени барыны да 354 миллион сом берликлери барды.

Чеклендириу ишни башлардан алгъа, компанияны специалистлери юй, мюлк сайын барып, эсгериулени сансыз этиу неге келтирлигин ангылатыргъа кюрешгендиле. Не сейир, анга кёпле къулакъ салгъандыла:  борчлары болгъанланы 98 проценти тёлеулерин мычымай берирге ашыкъгъандыла. Аны хайыры бла 344 миллион сом жыйылгъанды.

Айтылгъаннга эс бурмагъанланы уа юйлерине эмда мюлклерине баргъан ток ызланы кесерге тюшгенди. Аланы санында 466 абонент эмда 70 предприятие бла организация барды. Была бары да онбир миллион сом чакълы берирге керекдиле.
«Хайырланыучуланы къайсысы да электрокюч ючюн эки айдан артыкъ тёлемей турса, къара чёпге тюшеригин билирге керекди. Ток къачан кесиллигини юсюнден информация компанияны интернет-сайтында басмаланырыкъды. Ол а абонентге билдириу жиберилгенича саналлыкъды», - деп, ишни бу чекге жетдирмезге чакъыргъандыла «Каббалкэнергода».