Баш мураты – миллет маданиятланы кёргюзтюу

Ставропольда маданиятны эм спортну «Кавказ оюнла – 2023»  тёрели фестивалы бардырылгъанды. Быйыл анга онтогъуз делегация къатышханды: Къыбыла эм Шимал-Кавказ федерал округладан, Донецк эм Луганск халкъ  республикаладан, Запорожье эм Херсон областьладан. Бу сейирлик байрамгъа Къабарты-Малкъардан да баргъандыла келечиле: Элбрус муниципал районну  Отарланы Омар  атлы  район музейи эм Усталыкъланы арасы.

Фестивальны мураты – миллет маданиятланы кёргюзтюу, халкъда  ёмюрледен бери сакъланнган оюнланы жангыртыу эм Россейни регионларыны араларында шуёхлукъну кючлендириу.

Элбрус районну музейини кёрмючюне фестивальда сейир бек уллу болгъанды, къараучула  таулуланы  миллет кийимлерине, кийизлерине бек бюсюрегендиле. Бусагъатда 2002 жылда ачылгъан музейде юч мингден артыкъ экспонат  сакъланады.

Жарсыугъа, биз алгъын тёлюлерибиз хайырланнган затланы атып къояргъа ёчбюз, сёз ючюн, кюбюрлени. Музейни директору Этезланы Фатиматны башламчылыгъы бла  шёндю  музейде кюбюр жыйымдыкъ барды. Дагъыда мында  бек сейирлик проектлеринден бири – озгъан ёмюрледен къалгъан суратлагъа кёре таулу миллет кийимлени къурауду.

Дагъыда бу кюнледе музейде Адыгланы кюнлерине аталгъан кёрмюч къуралгъанды эм экскурсияланы бёлюмюню башчысы Толгъурланы Фатима бла  назмучу эм музейни ишчиси Ёзденланы Женя Отарланы Керим атлы  биринчи номерли лицейде тёртюнчю классда окъугъанлагъа черкеслилени тарыхларыны эм маданиятларыны юслеринден айтхандыла.