Бизнесге - жангы онгла

Къырал эм муниципал жумушланы бирикдирилген «Госуслуги» порталында толтурургъа онг болгъан жумушланы саны ёсгенди.  Россейни Правительствосу 2023 жылда «Госуслуги» порталда тюрлю-тюрлю жумушланы толтурургъа эркинлик документлени  жарашдырыу жаны бла планны тамамлагъанын белгили этгенди. Алай бла энди лицензияланы, тюрлю-тюрлю эркинликлени къысха заманны ичинде автоматизацияланнган халда алыргъа жарарыкъды.

Объясняем.рф порталда айтылгъаныча, жылны аллындан бери «Госуслугиде» 190 энчи жумушну толтурурча мадарла этилгендиле, алай бла бюгюнлюкде битеу да бирге  420 эркинликни жарашдырыргъа  боллукъду, ол санда 50 лицензияны да. Ол а предпринимательлеге артыкъда магъаналыды. Эркинлик берген документлени хазырлар ючюн «Госуслугиде» энчи бет барды. Аны бла хайырланнган кезиуде, документ не халда болгъанын, къалай жарашдырылгъанын кёрюп турургъа боллукъду.

Алай бла уа предпринимательлеге керекли эркинликлени алыуну заманы къысхартылгъанды. Энди документлени бизнесмен кеси жыймайды, жууаплы ведомствола бир-бирлерини араларында  байламлыкъланы болушугъу бла аллыкъдыла.  Аны хайырындан а эркинликни бериуню заманы 43 процентге къысхартылады. Аны бла бирге уа предприниматель жыяргъа керекли документлени саны 38 процентге аз болгъанды.

 Лицензияланы бла тюрлю-тюрлю эркинликлени жарашдырыуну заманын къысхартыу проект сынау халда 2021 жылда ишлеп башлагъанды. Ал кезиуде «Госуслугиде» электрон  халда лицензияланы хазырларгъа боллукъ эди. Проект кесини хайырлылыгъын кёргюзтгенди. Бюгюнлюкде къыралда лицензияланы 70 проценти онлайн амал бла  хазырланадыла.

Ызы бла уа бу сынаугъа эркинлик бериу системаны къошаргъа оноу этилгенди.  Ахыр эки жылны ичинде РФ-ни Правительствосу битеу тийишли жумушланы электрон халгъа кёчюрюу жаны бла ишни бардыргъанды.

- Бизнесге лицензияланы бла тюрлю-тюрлю жумушланы  толтуруугъа эркинликлени хазырлау женгилирек болурча, ачыкълыкъны жалчытырча мадарла толтурулгъандыла. Аны хайырындан а бизнес заманын зыраф этмейди. Бюгюнлюкде белгиленнген жумушла барысы да тамамланнгандыла, алай бу ишни хайырлылыгъын ёсдюрюу мадарла мындан ары да бардырыллыкъдыла. Ол санда предпринимательле бла байламлыкъла къуралып, аланы оюмлары да ачыкъ этилликдиле, - дегенди къыралны правительствосуну башчысыны экинчиси  Дмитрий Григоренко.

Предпринимательге документле, лицензия берилмеген, неда болжалла созулгъан кезиуде уа тарыгъыуланы сюдге дери тинтиу жаны бла сервисни юсю бла берирге онг барды.