«Муратым юйретген сабийлерими жетишимлерин кёрюргеди»

Малкъар халкъыбызда спорт бла тири кюрешген, иги жетишимле болдургъан жаш адамларыбыз кёпдюле. Геккиланы Магометни жашы Таукъан да аладанды.

Таукъан 1987 жылда Тырныаууз шахарда туугъанды, анда 2-чи номерли школда окъугъанды. Ауур атлетика бла гитче заманындан бери кюрешеди, спортну халкъла аралы устасыды, Россейни Кубогун алгъанды. Бусагъатда ол сабийлени юйретеди. Бюгюн Геккиланы Таукъан бизни ушакъ нёгерибизди.

- Таукъан, спортха къалай келгенинги, ауур атлетиканы нек сайлагъанынгы юсюнден айтсанг эди?

- Жети жылымда каратеге, картингге эм лыжалагъа жюрюп башлагъанма.  Ауур атлетикагъа уа онбир жылымда тренер Маккаланы Махтини хайырындан келгенме. 

Ол бизни бла  къоншулукъда жашагъанды, жууукъ да жете эди. Бир кере орамда кёрюп кесине чакъырады, мен санга топ берликме деп. Аз-аздан жарау этерге анга бара турама да, жаратама. Каратени къоюп, жашыртын штангагъа жюрюйме. Абаданла аны эшитгенде, ёсмей къаллыкъса деп, ыразы болмайдыла. Алай бу жолумдан таймайма. Шёндю мени юйретиуге уллу къыйын салгъан, кёп ахшылыкъ этген тренериме жюрек ыразылыгъымы билдирирге сюеме. 

- Сайлауунга сокъуранмагъанынг, айхай да, игиди. Жетишимле да кёп сакълатхан болмазла?

- Хау, эм алгъа 2001 жылда Россейни окъуучуларыны араларында биринчиликде экинчи жерни алгъанма. Ызы бла Россейни спортуну устасына нормативни толтуруп, Францияда Ницца шахарда бардырылгъан биринчиликде кюмюш майдал къоллу болгъанма.

2003 жылда Окъуучуланы биринчи жай спартакиадаларында ючюнчю жерге чыгъып, экинчи жыл Норвегияда Ставангер шахарда турнирге къатышханма, алай къолуму ачытханым чырмау этип, анда тёртюнчю жерде къалгъанма. Аны хатасындан талай жылны эришиулеге баралмай тургъанма.

-  Сора артха спортха  къачан къайтханса?

- Кесими сынаргъа таукел тёрт жылдан сора болгъанма. 2008 жылда Россейни кубогунда экинчи жерни алгъанма, 2009 жылда уа къыралны чемпионатында да экинчи болгъанма.

2009 жылда аркъама операция этдирирге тюшген эди. Бир кесек тюзелгенлей, 2011-2012 жылда РФ-ни чемпионатында эришип, ючюнчю эм экинчи жерлени алгъанма, Кубокда хорлагъанымдан сора уа, спортну халкъла арасы устасы деген ат берилгенди. Алай саулугъума чып тюшгени биягъы кесин билдирип башлагъанды - ауурлукъ кётюрюрге жарамай эришиулеге андан сора къатышалмагъанма.

- Аллай бир къыйналгъанда, спортну къояргъа деген сагъыш а келмегенми эди?

- Хау, аллай арсар заманларым да болгъандыла. Алай спорт сени   сайлауум  эди. Адамны бир уллу мураты болса, ол не да этип анга жетерге итинеди. Мен а Олимпиада оюнлагъа къатышыргъа сюе эдим, алай, жарсыугъа, къолум да сыннганы, операция да этилгени ол  умутума жетерге къоймагъандыла. Аны ючюн 2010 жылда спортдан кетеме. Алай атамы термилип тургъандан эсе, къолунгдан келгенни эт деген сёзлеринден сора, жангы кюч бла  2011 жылда артха къайтама.

- Сора тренер ол замандамы болгъанса?

- Тренер ишге 2013 жылда киришгенме, ары дери жарау эте тургъанма. Анча жылны ичинде бу ишге бек юйреннгенме, энди муратым кесими толмагъан умутларымы сабийлени жетишимлеринде кёрюргеди.

- Спорт школда ишинг а къалай къуралыпды?

- Жюрюген сабийле кёпдюле, аланы араларында тёртжыллыкъ жашчыкъла да бардыла. Республиканы биринчилигинде хорламлары бла Хаджиланы Махай, Геккиланы Атмир, Гемуланы Беслан, Болатланы Артур эм кёп башха спортчуларыбыз кёл этдиргендиле.

- Бусагъатда спорт бла кюрешген жаш тёлюбюзге къаллай сёзле айтырыкъ эдинг?

- Арслан жюреклиле болсунла. Жашауда, спортда да аз тюрлю затха тюбемейсе, не заманда да, не болса да, адамлыкъларын тас этмесинле.