Жыр фахмулары бла къууандыргъан къарындашла

Арт жыллада къарачай-малкъар халкъны сахнасы фахмулу жаш тёлюден байыкъланнганды. Эки къарындаш Таукенланы Алим бла Салим да ол сандадыла. Аланы «Тау халкъым», «Жашаууму жарыгъы», «Дарина», «Таулу къыз» деген эм башха жырлары къараучуну кёлюне жетгендиле. 

Алимни айтханына кёре, аланы аппалары Таукенланы Хажидаут къобузчу болгъанды, аналарыны жанындан аммалары уа  ариу жырлагъанды.   Жаш жыргъа фахмусу болгъанын билгенликге, аслам заманын карате бла кюрешиуге бёлгенди. Алай санына чып тюшюп, жарау этерге амалы болмай къалгъаны себепли спортдан кетгенди. 

Ол 1987 жылда Чегем шахарда туугъанды, жырлап 15 жылында башлагъанды.  Уллу сахнагъа биринчи кере 17 жылында чыкъгъанды,  Нальчикде    «Салам-Алейкум» фестивальгъа къатышханында. Андан сора эки жаш бла къыз болуп, «РАЭД» деген чыгъармачылыкъ къауумну къурагъандыла. Жарсыугъа, ол кёп бармай чачылгъанды. Жыл да ётгюнчю, Этчеланы Ислам, Жаникаланы Элдар,  Занкишиланы Марат «Асса» деген къауумну санында жырлап башлайдыла. Алай Элдар, кеси энчи жырларгъа сюйюп, андан кетеди. Бу болумдан сора ары Батчаланы  Омарны бла Алимни чакъырадыла. Алай бла ол анда жырлап тебирейди, ала эришиулеге къатыша, жетишимли да боладыла. 

- Анамы къарындашы Табакъсойланы Мухтар айтып «Асса» деген атыбызны  «Ас Алан» дегеннге алышабыз. 2008 жылда  тюрк миллетлени араларында бардырылгъан «Урал Моно» фестивальда биринчи жерни алабыз. Ызы бла 2-3 кере да  «Эжиу этедиле къаяла»  деген конкурсда  алчы жерлеге чыгъабыз.  Андан сора  да, «Золотой  граммофон»,  «Песня года» конкурслада да атыбыз айтылады, - дейди Алим бизни бла ушагъында. 

 «Ас Аланла» бир альбом жаздыргъандыла,  5-6 клип да алгъандыла, 30-дан аслам жырлары барды. Ызы бла жашла, Шимал Кавказны миллетлерини араларында бардырылгъан «Дарий жолда жаухар»  деген фестивальгъа  къатышып биринчи жерни алгъандыла.  

Алимни гитче къарындашы Салимни да къараучула таныйдыла. Къысха заманны ичинде ол да кесин сюйдюргенди. Салим  1993 жылда туугъанды, жырлап а  7-8 жылындан башлагъанды.

- Биричи кере Чегемни Маданият юйюню сахнасында Юрий  Шатуновну «Белые розы» деген жырын айтхан эдим, - деп эсгереди ол. - Сабий болгъаныма эте болур эдиле, къараучула ёрге туруп къарс къакъгъанлары эсимде къалгъанды. Андан сора мени кёп эришиулеге, концертлеге да чакъырадыла. 2010 жылда  Чегем шахарда бардырылгъан эришиуде биринчи жерни, 2012 жылда «Салам-Алейкум» фестивальда бла  2013 жылда «Эльбрусоидни ауазы» конкурсда алчы жерни алгъан эдим.

Салим Къабарты-Малкъар къырал университетни инженер-технология факультетин бошагъанды, бюгюнлюкде  усталыгъына кёре ишлейди. Аны ючюн конкурслагъа артыкъ тири къатышалмай эсе да, сахнаны къояргъа уа демейди, жырларгъа бек сюеди.

Къарындашла аланы фахмуларын айнытыргъа себеплик этген  композиторла Этчеланы Музафаргъа бла Зейтуннга, Бёзюланы Алимге  жюрек ыразылыкъларын билдиредиле эмда мындан арысында да къараучуланы жангы, ариу жырлары бла къууандырыргъа мурат этедиле.

Темуккуланы Аминат.
Поделиться: