«Саусузлагъа къачан да сагъайгъанлай турама»

Медицинаны жолун сайлап, анга жюреклери бла берилип, кертичилей къалгъанларындан сора да, жамауатдан ыразылыкъ табып ишлеген жашларыбыз бла къызларыбыз хурметге тийишлидиле. Аладан бириди Къадырланы Азинат Бёзюланы Османны къызы. Алгъаракълада Ыразылыкъ къагъытла эмда грамотала бла саугъаланнган медиклени арасында ол да бар эди.

Азинат бюгюнлюкде Нальчикде Онкология диспансерде терапия бёлюмде врач-онкологду, эмда химиотерапевтди. Ары дери уа, Къабарты-Малкъар къырал университетде окъуй тургъанында, терк болушлукъ берген станцияда да ишлегенди.

Аны «онкология» ызда тохташыууна уа себеплик этген аспирантурада билим алгъан кезиуюнде сагъынылгъан диспансерни ол замандагъы башчысы Анатолий Канцалиевни сейир дерслери болгъандыла. Алада тюрлю-тюрлю клиникалы болумланы юслеринден эшите, бу жолну сайлагъанындан арысында къыйын ауруудан инжилгенлеге себеплик этиуню тюз кёргенди.

Ары дери уа ол Биринчи Чегемни ючюнчю номерли битеулю билим берген мектебин, университетни да алты курсун бошагъанындан сора, интернатураны, ординатураны да «терапия» эмда «кардиология» ызда бошагъан эди. Алай эсе да, белгилегенибизча, Анатолий Леоновични тынгылы лекциялары анга саулукъ сакълаугъа башха кёзден къаратхандыла.

Кертиди, медицинада кесини энчилиги болмагъан бёлюм барды дерге да къыйынды. Алай эсе да, онкология – жандауурлукъну, жюрек халаллыкъны, къайгъырыулукъну бегирек излеген бёлюмдю. Аны алайлыгъын а врач кеси да чертеди.

– Аллай ауругъанлагъа бакъгъан, къарагъан да тынч тюйюлдю. Адамлагъа къолунгдан келгенича болушлукъ этерге, аланы кёллерин алыргъа кюрешгенлей тураса. Ишден юйге барсам окъуна, телефонуму ёчюлтюп къоймайма. Саусузлагъа къачан да, къалайда да сагъайгъанлай турама, ала мени акъылымдан, сагъышларымдан бир такъыйкъагъа да кетмейдиле. Башхача айтханда уа, не тюрлю амалны-мадарны да хайырланып, ала къыйналмазча этерге кюрешеме. Жангы багъыу амаллагъа юйреннгенлей, аланы ангыларгъа, билирге да кюрешгенлей турама, – дейди ол.

Арт кезиуде медицина айный баргъанын барыбыз да билебиз. Аны къайсы бёлюмюнде да жангычылыкъла, кеслерини орунларын таба, жашауда бардырыла, саулукъ сакълауну бир кесеги бола да барадыла. Азинат да жыл сайын багъыу амалланы жангыдан-жангылары чыгъа баргъанларын, ол алагъа дайым да тюшюннгенлей тургъанын айтады. Жаланда усталыкъ бла байламлы литератураны, журналланы хайырланып къоймай, белгили врачланы, профессорланы лекцияларына тынгылайды. Ала жылдан-жылгъа сынала баргъан дарманлада, багъыу мадарлада къайсылары онглуракъ болгъанларын ачыкълагъанларына да эс бургъанлай турады.

Къыйын саусузлагъа къарап, иши ауур болгъаны эмда анга кёп заманы кетип, жетишалмагъаны ючюн, илму бла кесини кюрешир онгу къалмай эсе да, дайым да усталыгъын, ангылауун ёсдюргенлей турады. Стамбул шахарда онкология ауруула бла байламлы къуралып озгъан халкъла аралы конференциягъа да къатышханды. Къыралыбызны ара шахарыны белгили багъыу араларында, Сочиде да бу ызда жангычылыкъланы юслеринден билдирген тюбешиулеге, жыйылыулагъа барып, алада сынамлы врачланы айтханларына тынгылайды, ауруугъа ол неда бу амал бла багъыу къалай озгъанын кёргюзтген эмда ачыкълагъан видеороликлеге да къарайды.

Ол затла уа барысы да аны кесини сынамыны  байыкъланырына, усталыгъы ёсерине, жангы дарманланы бла багъыу амалланы билирине себеплик этедиле. Аллай тюбешиулени хайырлары бла ишинде башха багъыу амалланы бардырыргъа да базыныулукъ табады. Сегиз жылны ичинде къыйын саусузланы кёллерин ала, аланы кеслеринден, жууукъ-ахлуларындан да ыспас сёзлеге тийишли болады. Бу жол врачны юсюнден газетге жазарыбызны да ала тилегендиле.

 Ишин айныуну жолунда, саусузлагъа къайгъырыулукъну бийик даражада бардыргъанындан сора да, Азинат ариу юйюр ёсдюреди. Амирхан быйыл энди школгъа барып башлагъанды. Ахматчыгъ а алыкъа садикге жюрюйдю. Жашчыкъла не усталыкъны сайласала да, къайда ишлеселе да, къатларындагъылагъа болушлукъ этерге хазыр, адет-тёрелерибизни унутмагъан адамла болурла деген муратдады аналары уа.