Эски чархлары болгъан машиналаны иелери тазир тёлерикдиле

Автомашиналары болгъанла  биринчи сентябрьден башлап  техникаларына бютюнда сакъ болургъа керекдиле. Аны тазирге келтирлик тапсыз ишлеген затларыны тизмеси иги да кенгертилгенди.

Алай бла энди жайда (июнь айны аллындан башлап августну ахырына дери) къыш чархланы хайырланыргъа чек салынады. Машиналарында къышда жай эмда ашалгъан чархлары болгъанла да тазир тёлерикдиле. Аны ёлчеми беш жюз сомду. Темир шинжилери болмагъан къыш резинаны уа сау жылны хайырланыргъа жарайды – аны ючюн сёз келлик тюйюлдю.

Автомашинаны чыракълары, аны къагъытларында кёргюзтюлген тюрлюлеринден башха болсала, аны ючюн да жарым минг сом тазир жазыллыкъды.

Тормоз системадан суу саркъгъаны, аны быргъылары ашалып неда тешик болуп тургъаны эсленсе, ABS-система ишлемесе, ала ючюн да жууапха тартырыкъдыла. Водительни аллында мияланы юсюнде планшет, видеорегистратор дегенча аллай затла тагъылып турсала да иш анга келликди.