Счётчикни пломбасы юзюлген эсе

Юйге келген сууну, электрокючню, газны асламысында счётчикле эсеплейдиле. Аланы къайсы тюрлюсюнде да пломбасы болады. Аны уа ол ресурсла бла жалчытхан организацияла салыучудула. Адам билмей неда ишин этип юзсе аны, артда тазир тёлерге тюшерикди. Аны ёлчеми артыкъ уллу да болмаз, алай счётчик пломбасыз турса, сууну, электрокючню эмда газны нормативлеге кёре тергеп башларыкъдыла. Ол а иги да багъа чыгъаргъа боллукъду.

Пломба юзюлгенин кёрсегиз, заявление жазып, аны сылтауун (биле эсегиз), кесин да къачан эслегенигизни билдиригиз. Ызы бла компанияны адамлары сиз ары дери къалай тёлеп тургъаныгъызгъа къарарыкъдыла. Счётчик кёргюзтгени ахыр квитанцияда жазылгъаннга келишсе, пломбаны иш этип юзмегенигизге ийнанырыкъдыла. Жангыдан заявка бергенигизлей, келип, жангы пломба саллыкъдыла. Аны уа багъасын тёлерге тюшерикди.

Пломбасы юзюлген счётчикни хайырланып турургъа керекмейди. Нек дегенде, компанияны адамы келип, аны алай болгъанын кёрсе, сиз азыракъ ахча тёлерча, ишин этип юзген сунарыкъды ол затны. Аны ючюн а, тазир жазып, жангы пломбаны багъасын да тёлетирикдиле. Андан сора уа, ахыр юч айны ичинде тёлеулени адам санына нормативлеге кёре тергеп, кесин да он кереге кёбейтип алай жазарыкъдыла. Аны тюзге санамасагъыз, сюдге барыргъа тюшерикди.