Суу бла жалчытыу игиленеди

«Таза суу» миллет проектни чеклеринде Къабарты-Малкъарда суу бла жалчытхан инфраструктураны къурау эмда жангыртыу жаны бла аслам иш этиле барады, деп билдиргендиле республиканы Къурулуш эмда ЖКХ министерствосундан.

Шёндю ишле онюч объектде бардырыладыла, ол санда  Нартанда сетьлени реконструкциясы, Лячинкъаяда къуюну жангыртыу, Терк шахарда суу бла жалчытыуну игилендириу. Дагъыда Тёбен эмда Огъары Курп элледе (эки участкада) сетьлени реконструкциясын бошагъандыла, Куба, Экинчи Лескен эмда Быллым элледе уа къуюла къазгъандыла. Быллымда таза суудан къыстырыкъ этген эки орун ишлегендиле эмда быргъыланы жангыртхандыла. Сармаково, Эски Черек, Анзорей элледе да аслам иш этилгенди.

Бу проектни чеклеринде, 2019 жылдан башлап былтыргъа дери бизни республикада оналты къую жарашдырылгъанды, 52 километр быргъыла орнатылгъандыла, 84 километр сетьле жангыртылгъандыла, сууну басым бла жиберген бир объект ишленнгенди. Аланы барына да 256,6 миллион сом къоратылгъанды. Аны хайырындан суу бла жалчытыу иги болгъанын 22,7 минг адам сезгенди. Быйыл да аланы саны 4,6 минг инсаннга кёбейирикди.

Прохладныйде – шёндюгюлю мектеп

Шахарда ишленнген жангы школ келир биринчи сентябрьде ачарыкъды эшиклерин. Ол  жангы оборудование бла жалчытылыныпды, инфраструктурасы да шёндюгю излемлеге келишеди. Хар классда компьютерле орнатхандыла, интерактив къангала, башха техника амалла да бардыла. Ала бары да билим бериуню бютюнда къыйматлы болуруна себеплик этерикдиле.

Мехкемеде  дагъыда спорт объектле бардыл: спортзал эмда талай майданчыкъ. Алада спортну кёп тюрлюлеринден жараула этерге боллукъду.

«Жангы школ ачыллыгъы бек магъаналы шартды бизни шахаргъа. Билим бериуню айнытыугъа, сабийлерибизни тамблагъы кюнлерине да къайгъыргъаныбызны кёргюзтеди», - дегенди Прохладныйни администрациясыны башчысы Вячеслав Архангельский.

Жюрекге бакъгъан диспансерде-жангы томограф

КъМР-ни саулукъ сакълау министри Рустам Калибатов Республиканы кардиодиспансеринде болгъанды. Шёндю анда жангы компьютер томограф орната турадыла. Оборудованияны «Жюрек-тамыр ауруулагъа къажау туруу» регион программаны чеклеринде алгъандыла. Аны жюрекни эмда баш мыйыны тинтгенде хайырланырыкъдыла.

Томограф тамырланы, жюрекни да  терен тинтип кёргюзтюрюкдю, кёп тюрлю аурууланы ал ышанларын туура этерикди.

Министр билдиргеннге кёре, келир жылда  Кардиодиспансерде ангиограф, УЗИ аппарат, реанимация эмда реабилитация бёлюмлеге оборудование орнатыллыкъды. Аланы сатып алыугъа регионну властьлары уллу магъана бергенлерин да  чертгенди министр.

Эсге сала айтсакъ, 2019-2022 жыллада республиканы саулукъ сакълау учрежденияларында онюч компьютер томограф эмда тёрт а магнит-резонанс томограф орнатылгъанды. Алай  бла шёндюгюлю диагностика оборудование багъыу махкемелени  барында да барды.