Айырмалы экспортёрланы сайлагъандыла

«Жылны экспортёру»  Битеуроссей премияны эришиу  комиссиясы Шимал Кавказ федерал округда хорлагъанланы белгилегенди, деп билдиргендиле КъМР-ни Экономиканы айнытыу министерствосундан.

Комиссияны жыйылыуунда онтёрт бёлюмде  алчыланы туура этгендиле. Къабарты-Малкъардан къатышханла эки биринчи жерни, бирер а экинчи эмда ючюнчю жерлени алгъандыла.

«Промышленность бёлюмде жылны экспортёру» атха тийишли болуп биринчи жерге «Терекалмаз» акционер бирлешме чыкъгъанды. Ол да сейир тюйюлдю: завод налмас инструментлени жарашдырыу эм чыгъарыу бла кёп жылланы кюрешеди, кеси бёлюмюнде алчыланы санына киреди. Продукциясын а жети къыралгъа жибереди, ол санда  Тюркге, Узбекистаннга, Беларусьха эмда Къазахстаннга да.

«Эм иги тиширыу экспортёр»  къошакъ номинацияда Аришева Мадина хорлагъанды. Ол «ТД «Аква-Кристалл» предприятияны башчысыды.

Бу предприятие дагъыда конкурсну «Хазыр аш-азыкъла бёлюмде жылны экспортёру» деген кесегинде ючюнчю жерни алгъанды. Анда татлы эмда гара суула чыгъарадыла, продукцияларын он къыралда сатадыла.

«АПК-ны базовый продукциясыны  бёлюмюнде жылны экспортёру» номинацияда «Отбор» предприятие экинчи болгъанды. Ол селекция-урлукъчулукъ арады, урлугъун Беларусьха, Къазахстаннга, Киргизиягъа эмда Азербайджаннга жибереди.