Чекле – къыралны ичинде туризмни айнытыргъа себеплик

Стратегия башламчылыкъланы агентствосу эм «Б1» компанияланы къаууму россейлилени къыралны ичинде туризмни юсюнден оюмларын ачыкълар мурат бла «Россейни ичинде туризм 2023; жангы горизонтла» деген тинтиуню бардыргъандыла, деп билдиредиле республиканы Курортла эм туризм министерствосуну пресс-службасындан.

Сорууну эсеплери адамла къыралыбызны ичинде солугъанларына ыразы болгъанларын бла къалгъанларын, аланы излемлери къалай толтурулгъанын, къыралны эм регионланы жанындан болушлукъну хайырлылыгъын кёргюзтгендиле. Анга битеу да 3 мингнге жууукъ инсан къатышханды, ол санда туризм эм къонакъбайлыкъ бла кюрешген 232 предприниматель да. Алай бла адамланы асламысы Россейде туризм жылдан жылгъа игиден-иги болгъанын чертгендиле, аны арталлыда жаратмагъанла жангыз юч процент болгъандыла, ала солууларын тыш къыраллада ётдюрюрге сюйгенлерин билдиргендиле. Бизнесни юсюнден айтханда, предпринимательле ишлерин кесибизни къыралны келечилерини излемлерин толтурурча къурагъанларын айтхандыла.

Алгъа жыллада туристлени кёбюсю Москваны бла Санкт-Петербургну сайлап тургъан эселе, быйыл башха регионлагъа да сейир ёсгенди. Сорулгъанланы 47 проценти Кавказгъа келирге сюйгенлерин билдиргендиле, 46 проценти – Кърымгъа, 38 проценти да – Узакъ Востокгъа. Орус Северге, Карелиягъа, Сибирьге бла Арктикагъа барыргъа излегенле да аз тюйюлдюле.

Агентствону «Шахар экономика» бёлюмюню башчысы Ольга Захарова белгилегенича, россейлилени кёбюсю кеслери жашагъан регионну да туризм жаны бла сейирге санайдыла, 77 проценти уа къыралны не къадар кёп жеринде болургъа, аны игирек таныргъа сюйгенлерин айтхандыла. Анга уа бу жаны бла ишлеген предпринимательле эс бурургъа керекдиле, ала кеслери да бизнеслерин кенгертирге, айнытыргъа мурат этгенлерин билдиргендиле.

«Б1» компанияланы къауумуну тепдирилмеген мюлк, транспорт, инфраструктура эм къырал компанияла жаны бла бёлюмюню башчысы Ольга Архангельская чертгенича, туризмге арт кезиудеги политика эм экономика тюрлениулеге келиширге тюшгенди. «Бу болумла, халкъла аралы чекле салыннганлары бир жаны бла чурумла чыгъаргъандыла, алай, бирси жаны бла уа, къыралны ичинде туризмни айнытыргъа кюч бергендиле. Бардырылгъан соруу да россейлиле къыралда кеслерине кёп жангы жер ачханларын, аланы кесибизде солургъа сейирлери ёсгенин кёргюзтгенди. Туризм бизнес да, анга кёре, айныйды, жалчытылыннган жумушланы тизмесин, качествосун да ёсдюрюрге кёлленипди», - дегенди ол.