Алдауну жолун кесген амал

Белгилисича, быйыл биринчи июльдан башлап  бизни къыралда  къурулушда борчлу халда эскроу-счётла  сингдирилгендиле. Ол не болгъанын КъМР-де Кадастр палатаны юридический бёлюмюню башчысы Залина Кумыкова ангылатханды:

- Энди  кёп фатарлы юйню анда жашарыкъланы ахчаларына ишлеген заманда,  гражданла  эмда организацияла тёлерик юлюшлерин  жаланда банкда энчи (эскроу) счёт ачып алай жыяргъа эркинлик бериледи. Юйню къурулушун а компания кеси ырысхысына неда кредит алып бардырады. Жашау журт битип, аны хар неси да хазырды, тапды, ол хайырланыугъа берилгенди эмда Жеринден тепдирилмеген мюлкню бир  къырал реестрине эсепге тюшгенди деген информация берилсе банкга, ол счётда жыйылгъан ахча къурулушчугъа кёчюрюледи.

Бу амалны хайырындан кёп  алдауладан, даулашладан  къутулургъа боллукъду. Къурулушну бардыргъан компанияла уа ишлерин терк эмда тынгылы этерге кюреширикдиле.