Карточкадан ахчаны тюкенде берирге, алыргъа да жарайды

Тюкенде  алгъан товарлары ючюн  Сбербанкны карточкасы бла тёлегенле  ызы бла,  керек болса, кеси счётларындан ахчаны кассадан  тешерге боллукъду. Финанс махкемени  Къабарты-Малкъарда бёлюмюнден билдиргенлерича, бу амал РФ-ни 76 регионунда, кеси да ол тийреледе банкоматла болмагъан узакъ неда адам аз жашагъан элледе сингдирилгенди. Финанс учрежденияны  программасына жети жюзден артыкъ сатыу-алыу предприятие къошулгъанды.  Бу жумуш алты элде тындырыллыкъды: Светловодскоеде, Бахсанда, Тегенеклиде, Элбрусда, Камлюковода эмда Шалушкада.

Банкны бёлюмюню башчысы Хамидби Урусбиев айтханнга кёре, ала КъМР-ни Правительствосу бла бирге «Безналичная республика» деген проектни бардырадыла. Тийишли келишимге талай ай алгъа къол салыннганды. Анга кёре, бу амалны сингдирирге эмда элледе жашагъанланы финансла жаны бла билимлерин  ёсдюрюуню къолгъа алыргъа оноу этилгенди. «Иш къалай баргъанына биз бек тынгылы къарайбыз, хар нени да сюзебиз, адамла айтханнга да къулакъ салабыз. Бу проект банкга, тюкенчилеге, хайырланыучулагъа да файдалыды. Талай замандан, кассада ахча тешер амалдан сора да,  тюрлю-тюрлю жумушла (сёз ючюн, ЖКХ-гъа) ючюн тёлерге да боллукъду. Биз оюм этгенден, аны да кёпле дурус кёрлюкдюле», - деп белгилегенди ол.

Шёндю  сагъынылгъан  элледе тюкенледе карточкада бир кезиуге 100-5000 минг сом тешерге боллукъду. Бир суткагъа уа ол 20 минг сом бла чекленеди. Комиссия тёлеу да алынмайды. Алай ахчаны тешер ючюн, тюкенде   бир зат сатып алыргъа керек боллукъду. Программагъа къошулгъан сатыу-алыу жерледе «Сиз мында ахча тешерге боллукъсуз» деген белги эмда бу жумушну жик-жиги бла ангылатхан инструкция тагъылады.