Бирлик – жюреклеге асыу

Бу кюнледе Махачкъалада  болгъан къыйынлыкъ битеу Россейни титиретгенди. КъМКъУ-ну аллында 14 августда анда ёлгенлени эсгере, жау чыракъла жандырылгъандыла. Митингге министерстволадан эм ведомстволадан къуллукъчула эм студентле къатышхандыла. «Нафта» бензоколонкагъа аны къатында автосервисден от тюшюп, отуз беш адам ёлгенди, жюзден артыгъ а жаралы болгъандыла, бусагъатда аланы жашауларын врачла сакъларгъа кюрешедиле.

Бир минут тынгылау бла башланнганды бу бушуулу жыйылыу. Миллетлени ишлери эм жамауат проектлени министри Анзор Курашинов: «Онючюнчю августда Махачкъалада болгъан къыйынлыкъ битеу да россейлилени жюреклерин къыйнагъанды. Биз бу бушуулу кюнледе биргебиз», - дегенди.

 Автосервисде жюз тонна селитра болгъанды, ол отдан чачылгъандан сора, тёгерек-башны от алгъан эди. Къыркъ юйге заран тюшгенди. Аланы санында сатыу-алыу ара, ашхана, межгит.

Биринчи бир машина кюйюп башлагъанды техобслуживанияны станциясында. Ол «Нафтагъа» бетден-бетге къарагъан мекямды. Ол заманда бирле машинаны алайдан кетерирге кюрешгендиле, башхала уа тохтап, телефонларына видео алып башлагъандыла. Аладан кёбюсю жаралыдыла, бир-бирлери уа ёлгендиле.

Бек алгъа кюе тургъан машина атылгъанды, ызы бла станцияда селитра. Ол къайдан чыкъгъанды? Станцияны бир къауум жери ортакъгъа бериледи, анда бир бизнесмен селитра тута эди. Ызы бла от «Нафтагъа»  кёчгенди, анда сегиз цистернадан экиси атылгъандыла. Адамла, машинала къарап-къарагъынчы кюйгендиле.

Битеу бу къыйынлыкъны баш сылтауу газ баллону жорукълагъа кёре салынмагъан машина болгъанды. Ол кюйюп башлагъандан сора уа, от тёгерекни-башны алгъанды.

«Нафтаны» иеси бу жолгъа дери да юч кере административ жууаплылыкъгъа тартылгъанды, ол заправкада къоркъуусузлукъну жорукъларын толтурмагъанды.

…Ненча адам ёлдю бир-бирлени жууапсызлыкълары ючюн?! Эки сабийчик машинада, аталары бла аналары тюкеннге кетгенлей, бир айдан сабий табарыкъ Москвадан юйюне келген тиширыу…

Махачкъалада къан берген станцияны аллына адамла кеслери ыразылыкълары бла бек терк жыйылгъандыла. Хар жаралы болгъанны къутхарыр ючюн къан керекди. Бир-бир къыйын саусузла вертолётла бла Москвагъа жетдирилгендиле.