Кёп фатарлы юйлени тап халда тутууда бек иги сынауланы ачыкълар умутда

«Единая Россия» «Бек иги юй. Бек иги арбаз» деген экинчи битеуроссей конкурс башланнганыны юсюнден билдиргенди. Ол юйлени иелерини кёп фатарлы журтлада барысы да хайырланнган ырысхыны тап халда тутуугъа тири къатышырча этер, ол жаны бла жууаплылыкъларын кётюрюр мурат бла къуралгъанды. Дагъыда бир магъанасы – инсанланы жашау журтла-коммунал мюлк бла байламлы не эркинликлери болгъанларын билдириудю, кёп къатлы юйлени ишлерин бардырыуда жангы сынаула эмда амалла бла шагъырейлендириудю.

Конкурсну баш борчларындан бири – жашау журтланы тап халда тутууда бек иги сынауланы ачыкълауду, ол жаны бла тири эмда жууаплы  иелени бла иги ишлеген управляющий компанияланы саугъалауду.

Конкурсну «Единая Россия» битеуроссей политика партия РФ-ни Къурулуш эмда жашау журтла-коммунал мюлк министерствосу, Тийрелени айнытыуну фонду, Жашау журтла-коммунал мюлкде жамауат контрольну «ЖКХ Контроль» миллет арасы бла бирге бардырады.

Эришиуле 4-ге бёлюнедиле: «Бек иги арбаз», «Барысындан да шуёх юй», «Бек иги подъезд», «Энергияны аягъан юй». Алагъа  инсанла эмда организацияла да къатышыргъа боллукъдула. Аны юсюнден  ала moydom.er.ru сайтха жазып билдирирге керекдиле. Конкурсха жаланда кёп фатарлы юйледе жашагъанла аны тапландырыу жаны бла бардыргъан ишлерини юсюнден материалла алынадыла. Сайлауну уа «халкъ экспертле» бардырадыла. Хорлагъанланы федерал жюри жамауатны оюмуна кёре тохташдырлыкъды.

Жамауатны къол кётюрюую 30 ноябрьге дери барлыкъды. Эсепле уа 1-8 декабрьде чыгъарыллыкъдыла. Айырмалыланы саугъалау быйыл 20 декабрьден кеч къалмай къураллыкъды. Хорлагъанлагъа эмда алчы жерлеге чыкъгъанлагъа ахча сертификатла, багъалы саугъала эмда конкурсну дипломлары бериледиле. Хар бирине уа конкурсну къурагъанладан ыспас къагъытла жибериледиле.  Хорлагъанланы тизмеси  проектни https://moydom.er.ru  сайтында басмаланырыкъды.

Материалланы конкурсха  https://moydom.er.ru сайтда анкетаны толтуруу бла электрон халда  быйыл 10 октябрьге дери москва заман бла 18:00 сагъатха дери жиберирге керекди.

Эсигизге салайыкъ, былтыр  битеуроссей конкурсну  «ТСЖ-ны бек иги ишлеу сынауу»  деген бёлюмюнде  Нальчикде Кадыров атлы орамда 24-чю номерли кёп фатарлы юй «кюмюш» къытханды. Бу эришиуге къатышханладан бек игиле экспертни бла жамауатны оюмларына кёре  сайланнгандыла.

Кадыров орамда 24-чю номерли юй тозурагъан журтладан кёчюрюуню программасына кёре ишленнгенди. Анда жашагъанла кеслери ТСЖ къурагъандыла эмда юйню жумушлары бла кеслери кюрешедиле. Ала бирге болуп, арбазда сабий майдан ишлегендиле, кир-кипчик атарча орунлагъа да жер бёлгендиле, юйню тёгерегин бегитгендиле, пандусла салгъандыла. Юйню, арбазны да тап халда тутар ючюн, анда жашагъанла дайым да изеуле къурайдыла.