Сабий больница жангы излемлеге келиширикди

Кёп болмай КъМР-ни саулукъ сакълау министри Рустам Калибатов Республиканы кёп профильли сабий клиника арасында болуп тынгылы ремонт ишлени толтурулгъанлары бла шагъырейленнгенди. Саулай алып айтханда, аны уллулулгъу 13 минг квадрат метрге жетеди. Анга комплекс халда ремонт этилгенден сора, ол регионда эм къоншу субъектледе саусузлагъа да кёп тюрлю ызгъа кёре тынгылы медицина болушлукъ берирча боллукъду.

Бу жол министр хирургия бёлюмге къарагъанды. Аны приём бардыргъан, диагностика, операцияла этген, реанимация, лор, урология, травматология, ортопедия эм нейрохирургия бёлюмлери да ишлерикдиле. Андан сора да, кюндюз бир жолгъа отуз саусуз жатарча стационары, эки жюз адамгъа палаталары эм бокслары да боллукъду.  Тынгылы ремонтдан сора ол жангы КТ, МРТ эм ашха оборудование бла жалчытылынныкъды.

Хирургия корпус ачылса, саусузланы къайсы бирине да профильли болушлукъ тапдырыллыкъды, ол санда бийик технологиялы медицина болушлукъ да.  Алгъаракъда жерлешлерибиз къыйын операцияла этдирирге федерал аралагъа баргъандыла, энди уа тышына чыгъаргъа керекмейди. 
Рустам Калибатов подряд организацияны келечилери бла тюбешип ремонт ишле къачан бошаллыкъларын билгенди. Эсге сала айтсакъ, тынгылы ремонт РФ-ни Правительствосуну билеклиги бла бардырылады.