Проектни жашауда бардыра

Къабарты-Малкъар къырал университетде «Карьерный маяк» атлы клубну кезиулю жыйылыуу озгъанды. Ол «Иш бериучюлени, студентлени эмда выпускниклени араларында  байламлыкъла» проектни чеклеринде окъуу юйню айныууну управлениясы къурап бардырылгъанды. Ол кеси да  «Приоритет-2030» академиялы алчылыкъны стратегиялы программасына киреди.

Сагъынылгъан управленияны Айныу арасыны директору Билимни Россей Обществосуну (РОЗ) лектору Кристина Лопатина тюбешиуге келгенлеге жамауатны аллында сёз айтыргъа, доклад окъургъа дегенча кезиуледе чыгъарны аллында къоркъууланы эмда ушакъ бардыргъан адамынг бла сёлеше, ол ушакъны къалай магъаналы этерге боллугъуну юслеринден айтханды. «Бюгюнлюкде бу тема окъуу юйню бошагъан жаш тёлю ишге кирген, собеседованиялагъа жюрюген кезиуде бютюнда кереклиди, магъаналыды»,-дегенди ол.

Жыйылыугъа келгенле уа глоссофобия не болгъанын, ол неден чыгъып къалгъанын да билгендиле. К.Лопатина жамауатны аллында сёлеширге  чыгъа туруп къоркъууну тюрлю-тюрлюлери болгъанын да ангылатханды. Аны сылтаулары да асламдыла – сабийликден келген психология жаны бла чырмаула; кесине ышанмагъанлыкъ эмда кесин бирсиледен эниш кёрюу; жамауат жаратмаз, тюз ангыламаз деп къоркъгъанлыкъ эмда суннганлыкъ; мыйысына чып тюшгени неда бир башха ауругъаны бар  эсе. Ол затланы ангылата, лектор адам жамауатны аллында сёлеширге къоркъса, аны жашауу социал, усталыкъ жаны бла да толу болмай къалыргъа  боллугъун чертгенди.

Андан сора да, сёлеширни аллында теманы жангыдан къайтарып, бирсилени кёз къарамларын да эсгерирге, алай бла уа адамланы сорууларына хазырланса тюз боллугъун ангылатханды. Презентация хазырласа, сёз ючюн, сёлеширик адам бу амал хар кезиуде да бир затны ызындан нени айтыргъа кереклисин эсгертгенин да. Къысха айтымла бла асыры бек да ашыкъмай сёлеширге тийишлисин белгилегенди.

Тюбешиуню кезиуюнде дагъыда адам доклад окъугъанындан, неда бир башха зат бла байламлы сёлешгенинден сора анда къаллай  кемчиликле этгенин эсге алса, артда жангылгъан, апчыгъан да этмей, дагъыда жамауатха тири къатыша турса, артда быллай жумушну тамамларгъа бир жолдан экинчисине тынчыракъ бола барлыгъыны юсюнден да айтылгъанды.

Андан сора да, жаш адамла  усталыкъ жаны бла айныуну, иш бериучюле бла къалай ушакъ бардырыргъа боллугъуну, ала бла байламлыкъны бардыргъан майданланы юслеринден да лекциялагъа тынгылагъандыла эмда кеслерине сейир болгъан затлагъа кёре соруула да бергендиле.