Аскерчилеге эмда аланы юйюрлерине себеплик этиу

 Бу кюнледе «КъМР-де Муниципал къуралыуланы советини» Ассоциациясыны  Правленини членлерини  кезиулю жыйылыуу болгъанды. Аны ишине КъМР-ни Башчысыны   ич политика жаны бла управлениясыны  эмда  жер-жерли самоуправление вопросла жаны бла начальниги Аслан Хасанов, КъМР-де СВО-гъа къатышханлагъа себеплик этиу жаны бла  «Ата журтну къоруулаучулары»  къырал фондну филиалыны башчысы Муаед Дадов,  КъМР-де регионлагъа башчылыкъ этиу араны таматасы Мадина Кадыкоева,  В.М.Коков атлы КъМКъАУ-ну ректору Аслан Апажев, КъМР-ни Башчысыны Администрациясыны ич политика эмда  жер-жерли самоуправление вопросла жаны бла кенгешчиси Алексей Храмцов,  жер-жерли администрацияланы башчылары эмда  муниципал районланы бла шахар округланы жер-жерли советлерини орунбасарлары къатышхандыла.

Жыйылыуда эки баш магъаналы вопросха къаралгъанды – энчи аскер операциягъа къатышханлагъа себеплик этиуню  къырал фонду бла КъМР-де  «Ата журтну къоруулаучусу» филиалы бирге ишлеу жаны бла келишимге къол салыу эмда  «КъМР-де муниципалитетледе ишлерик кадрланы хазырлау эмда  сайлау».

Жыйылыуну Ассоциацияны правленини председатели Максим Панагов  ачханды эм бардыргъанды. Залда олтургъанланы  аллында сёлеше, КъМР-де  энчи аскер операциягъа къатышханлагъа себеплик этиу жаны бла  «Ата журтну къоруулаучулары» деген фондну  филиалы къуралгъаныны юсюнден билдириу этгенди.

-Муниципалитетле Ата журтну къоруулаугъа тургъан адамлагъа энчи кёзден къараргъа керекдиле эмда  республиканы жер-жерли власть органларыны ишлеринде  ол жумуш баш болургъа керекди. Бизни  борчубуз а РФ-ни Президенти Владимир Путин Фондну аллында  салгъан борчланы  толусунлай тамамланылырча этиудю. Бу ишде  жер-жерли самоуправление органланы жууаплылыкълары  аз тюйюлдю. Аны бла  байламлы муниципал къуралыуланы совети  фондну Къабарты-Малкъарда  филиалы бла  келишимни проектин жарашдыргъанбыз,-дегенди                                                                        Панагов  эмда сёзню  филиалны башчысы Муаед Дадовха бергенди. Ол а  организация мындан ары къалай ишлеригини юсюнден тынгылы билдириу этгенди.

-Фондну баш магъаналы иши – СВО-гъа къатышхан ветеранланы эмда аланы юйюрлерине не жаны бла да себеплик этиудю. Мында алагъа бир терезе деген жорукъ бла болушлукъ этилликди. Хар аскерчини юйюрюне социал координатор къарарыкъды, ол фондха ала жиберген  соруулагъа, тилеклеге, дагъыда алагъа ушаш затлагъа  терк окъуна къарап, тамамлауну жолларын излерикди. Фондну борчларындан бири- алагъа тийишли болушлукъну заманында эмда толусунлай алырча этиудю. Анга медицина болушлукъ  эмда социал реабилитация этиу, дарманла, реабилитация жаны бла техника амалла бла  жалчытыу, психология болушлукъ этиу эмда  санатор-курорт багъыу киредиле. Андан сора да, организация ветеранлагъа сюйген усталыкъларына юйренирча онгла къурарыкъды. Борчланы араларында ветеранланы жамауатны  арасында ёсюп келген инсанланы патриот ниетледе юйретиу ишлеге тири къатышдырыу  да барды. Андан сора да, фонд СВО-гъа къатышханлагъа эмда аланы юйюрлерине болушлукъ этген  волонтёр организациялагъа да  себеплик этерикди,- дегенди  Дадов эмда жер-жерли  администрацияланы башчыларына фондну членлерине не жаны бла да себеплик этерлерин тилегенди.

Жыйылыугъа къатышханланы алларына салыннган борчну магъаналылыгъын ангылап,  келишимни бары да бир кибик къабыл кёргендиле.

Анга  Ассоциацияны  правленини председатели Максим Панагов эмда  фондну башчысы Муаед Дадов къол салгъандыла.

Экинчи  вопросха кёре  Алексей Храмцов  сёлешгенди. Кесини докладында ол муниципалитетледе ишлериклени профессионализмлиликлерини юсюнден айтханды.

-Республикада КъМР-ни къырал службасы жаны бла программа тамам болгъанына да къарамай, бюгюн да аланы билимлерин кётюрюу жаны бла  программа ишлеуюн тохтатмагъанды. Элбрус, Бахсан, Терк  муниципал районлада эмда Бахсан шахарда ишлегенлени  профессионал усталыкъларын кётюрюу жаны бла  ишле жангыртылып эмда 2025 жылгъа дери  бардырыллыкълары тохташдырылгъанды. Муниципал къуралыулада ишлегенлеге  къошакъ профессионал билим бериу  РФ-ни субъектлерини законуна эмда  самоуправления актланы мардаларына тийишлиликде бардырылады.

-Муниципал кадр резервлени  юсюнден айтханда, анда болум  къошакъ профессионал  билим бериуде бир кесек осалыракъды, алай эсе уа,  аны тирилтирге керекди. Республиканы  132 муниципалитетинден жаланда 60 къуралгъанды эмда  анда 310 адам барды. Ол ишни тынгылы этиу бизни, сизни да борчубузду,- деп чертгенди, докладчы. Андан сора да, ол «Машук» билим бериу Арада Къабарты-Малкъардан баргъан  команда регионда биринчи болуп  башчылыкъ этиуню  программасын  жашауда бардыргъанын да  билдиргенди. Ол къырал эмда муниципал къуллукълада ишлерик  адамланы хазырлаугъа бурулупду.

Кесини оюмун ол вопрос бла байламлы  Аслан Апажев да айтханды. Анга залда олтургъанла  къулакъ салып тынгылагъандыла. Ол вузда  алимле къырал  кадрланы хазырлау жаны бла  къаллай уллу иш бардыргъанларыны юсюнден айтханды.

Сёлешиулени кезиуюнде Бахсан муниципал районну жер-жерли самоуправление советини  председатели Анзор Ахобеков алада кадрла политика жаны бла иш къалай бардырылгъаныны юсюнден билдириу этгенди.

-Бир ненча жыл мындан алгъа биз ишчи къауум къурагъанбыз. Ол жыл сайын  белгиленнген жумушланы дайым да бардырады. Ала тамамлагъан ишле районну башчысына эмда башха оноучулагъа  кадрла жаны бла къаллай сорууну да тамамларгъа себеплик этедиле.

Жыйылыуну кезиуюнде Мадина Кадыкоева да сёлешгенди. Ол айтханнга кёре, республиканы  муниципалитетлерини  ишлерине  социал сетьледе  бийик багъа бериледи, Федерал даражада адамла бла байламлыкъ жюрютюуде  да КъМР СКФО-ну  регионларыны арасында биринчи жерни алады эмда къыралда бек иги оноуланны санына киреди.

Тюбешиуню ахырында Максим Панагов жер-жерли самоуправленияны айнытыу жаны бла Битеуроссей   ассоциацияны  сыйлы грамотасын  Бахсан шахар  округга бергенди. Къаралгъан соруулагъа  кёре тийишли оноула этилгендиле.