Жамауат иш бла шагъырейлендирликдиле

«Билим бериу» миллет проектни «Сабийликни навигаторлары» деген Битеуроссей проектини чеклеринде Нальчикни отуз экинчи номерли битеулю билим берген мектебинде биринчи сентябрьден башлап директорну юйретиу эмда сабий жамауат биригиуле бла байламлыкъны бардырыу жаны бла кенгешчилери ишлеп тебирерикдиле. Бу къуллукъну уа Россейни Президенти Владимир Путинни оноууна тийишлиликде къыралны 45 регионунда былтыр кийиргендиле. 2023-2024 окъуу жылны аллындан а быллай кенгешчиле къыралны битеу да школларында, техникумларында эмда колледжлеринде боллукъдула.

Кенгешчилени баш борчлары уа окъуучуланы сабий, жамауат биригиулени бла организацияланы ишлери бла шагъырейлендириудю. Бу къуллукъда ишлерге сюйгенле навигаторы детства.рф. сайтда сайлаулагъа къатышыр муратда заявкала бергендиле. Къабарты-Малкъардан а аллай заявкаланы берген 237 адам болгъанды.

КъМР-ни Жарыкъландырыу эмда илму министерствосу эришиуню биринчи урумуну эсеплерине кёре эксперт къауумну къурагъанды. Аланы араларында уа юйретиу, педагогика эмда психология жаны бла окъуучула, къырал власть органланы, жамауат биригиулени, билим  бериу эмда илму организацияланы келечилери да бардыла.

Эришуде хорлагъанла дагъыда собеседованиядан ётгендиле. Аны эсеплерине тийишлиликде уа ала окъутууну заочный бёлюмюне къошулгъандыла эмда жангы окъуу жылдан башлап анда билим аллыкъдыла.

Андан тышында да, муниципал координаторланы жерлерине сайлаула да бошалгъандыла. Аны кезиуюнде экеулен айырылгъандыла. Дагъыда «Сабийликни навигаторлары» республикалы ресурс арада ишлерикле да белгиленнгендиле. Аланы санында уа, араны башчысындан сора да, беш къуллукъчусу барды.

Мокъаланы Зухура.
Поделиться: