Сабийлени школгъа хазырлаугъа бирча къошулургъа

«Единая Россия» тёреге айланнган «Сабийни  школгъа хазырла» жандауурлукъ жумушну  башлагъанды. Ол къыралны битеу регионларында да бардырыллыкъды.  Аны кезиуюнде кёп сабийли, къолайсыз, къыйын жашау болумгъа тюшген, сакъат сабийлени ёсдюрген юйюрледе ёсген жашчыкълагъа бла къызчыкълагъа школда керекли затлары бла рюкзакла саугъаланырыкъдыла.

 РФ-ни Къырал Думасыны Жарыкъландырыу жаны бла комитетини башчысыны орунбасары – «Жангы школ» партия проектни жашауда бардырыугъа жууаплы Алёна Аршинова айтханыча, былтыр  жангы окъуу жылны аллында быллай болушлукъ 200 минг школчугъа этилгенди. «Сабийни окъууну аллында къууандырыргъа, акциягъа къатышып, саугъала хазырларгъа хар ким да эркинди.  «Единая Россия» регионлада школ кереклени жыйгъан энчи жерлени къурайды. Ары сабий чыгъармачылыкъгъа керекли затланы, школ форма, чурукъла, спорт бла кюреширча эм башха затланы келтирирге жарайды. Школчулагъа саугъаланы партияны жамауат жанлыларыны штабында да къояргъа боллукъду»,-дегенди Алёна Аршинова.

Партияны Ара толтуруу комитетини  башчысы  Александр Сидякин билдиргенича, былтыр жангы регионлада окъууда керекли затлары бла рюкзакланы 40 минг школчу алгъандыла. Быйыл да акция андан ары бардырыллыкъды жашауда. «Биринчи класслагъа баргъан жашчыкъла бла къызчыкъла аланы  партияны толтуруу комитетлеринде эмда «Единая Россия» «Ридовка болушады» фонд бла бирге Северодонецкде эм Лисичанскда ачхан  жандауурлукъ пунктлада алыргъа боллукъдула. Кеслери келалмагъанлагъа уа волонтерла саугъаларын юйлерине жетдирликдиле»,-дегенди Александр Сидякин.

 Алёна Аршинова дагъыда партияны депутатлары ата-анала бла бирге школланы тийрелерин бла  спорт майданланы хазырлыкъларын тинтириклерин билдиргенди.    «Былтыр тинтиулеге 12 минг ата-ана къатышхандыла. Ала мекямлада бардырылгъан тынгылы жангыртыу жумушланы, ашханаланы болумларын, тийрелени айбатландырылгъанларын сюзген эдиле. Депутатла устазла, ата-анала бла тюбешип, кемчиликлени, жетишмеген затланы ачыкълап, аланы тамамлауну мадарларын излейдиле»,-дегенди ол.

 Партияны КъМР-де бёлюмюню толтуруу комитетини башчысы, «Единая Россияны» регион бёлюмюню секретарыны орунбасары   Дмитрий Парафилов   KABARDIN-BALKAR.ER.RU сайтны келечилерине айтханыча,  жангы окъуу жылны аллында жандауурлукъ жумушла партияны 13 жер-жерли бёлюмюнде бардырыллыкъдыла.

- «Сабийни школгъа хазырла» акцияны чеклеринде кёп сабийли, къолайсыз, къыйын жашау болумгъа тюшген юйюрледе ёсген жашчыкълагъа бла къызчыкълагъа   болушлукъ этилликди. Бу жумушлагъа партияны депутатлары да къатышадыла. Болсада республиканы хар инсаны да бу чомартлыкъ ишге кеслерини юлюшлерин къошаргъа эркиндиле. Школчулагъа окъууда керекли затланы партияны жер-жерли толтуруу комитетлерине келтирирге онг барды,-дегенди Дмитрий   Парафилов.