Шёндюгю излемлеге келиширча

Нальчикде ючюнчю номерли поликлиниканы Мечиланы Кязим атлы орамда орналгъан бёлюмюне тынгылы ремонт этилликди. Ишле «Саулукъ сакълауну ал бёлюмюн жангыртыу» федерал программаны чеклеринде бардырлыкъдыла, деп билдиргендиле республиканы Саулукъ сакълау министерствосундан.

Бу поликлиника 32 минг адамны жумушларына къарайды, кюн сайын 364 саусузну алыр онгу барды. Анда 32 жерли кюндюзгю стационар да ишлейди.

Специалистле объектни коммуникацияларын алышыу бла кюрешедиле, отоуларына да ремонт эте турадыла. Хар неда тамам этилгенден сора, поликлиникада жангы оборудование орнатыллыкъды. Ары келгенлеге битеу онгла къураллыкъдыла, регистратура да шёндюгю излемлеге кёре ишлерикди. Саусузланы бир къаууму башхалагъа къатышмай кирирча энчи жери да боллукъду анда. Дагъыда диагностика бёлюм ачыллыкъды. Жангыртыу жумушла келир жылда июньда бошаллыкъдыла.

Министерстводан билдиргенлерине кёре, Май эмда Бахсан районланы ара больницаларыны сабий поликлиникаларына да тынгылы ремонт этилгенди. Быллай ишле Терк районну больницасында эмда Нальчикде республикалы сабий клиника (кёп профильли) арада да бардырыла турадыла. Экинчиси кесини ишинде саулай Шимал Кавказда окъуна эм уллу учрежденияладан бири боллукъду. Анда эндокринология, нефрология, хирургия, реабилитация, офтальмология, дагъыда нерва-шаугют, генетика, орфан аурууланы бёлюмлери, микробиология лаборатория да ишлерикдиле. Бу объектле «Сабий саулукъ сакълауну айнытыу, ол санда гитчелеге медицина болушлукъ бериу жаны бла шёндюгю инфраструктура къурау» деген федерал проектге эмда «Саулукъ сакълауну ал бёлюмюн жангыртыу» программагъа киредиле.

Эсге сала айтсакъ, «Саулукъ сакълау» миллет проектни хайырындан Нальчикде биринчи номерли сабий поликлиника алгъаракълада жангыртылгъанды. Тийишли ишлени кезиуюнде аны жери эки кереге уллу болгъанды, кесинде уа медицина болушлукъну жангы тюрлюлери берилип тебирегендиле.

Этиле баргъан ишлени эмда умутланы юсюнден министерствону жамауат советини келечиси Юрий Кагермазов былай айтады: «Къырал сабий поликлиникалада хар неда игисине айлана барады, талай жыл алгъын болум бла тенглешдирирге окъуна керекмейди. Быллай учреждениялада болгъан кезиуледе биз, ата-анала эмда медикле бла сёлешебиз, саусузладан тарыгъыула иги да аз болгъанын кёребиз. Ишде болум иги бола баргъанын, къырал эмда республика себеплик этгенлерин да сезип, врачла саусузлагъа бютюнда сакъ кёзден къарайдыла».

Министрни орунбасары Марат Кармов билдиргенича, жангыртыу программагъа битеу сабий медицина учрежденияла кирликдиле.

 

Улбашланы Мурат хазырлагъанды.
Поделиться: