Комбинат бюгюннгю излемлеге келиширикди

Кёп болмай КъМР-ни Правительствосуну  Председатели Мусукланы Алийни башчылыгъы бла   ишчи комиссияны кенгеши болгъанды. Ол  Тырныауузда комбинатны жангыртыугъа эм вольфрам-молибден магъаданны къазып башларча проектге аталгъанды.    Аны юсюнден бизге КъМР-ни Правительствосуну пресс-службасындан билдиргендиле.

Жыйылыуну ача, Алий Тахирович Тырныауузда вольфрам-молибден къазгъан комбинатны  жангырытыу республикада уллу инвестициялы проектледен бири болгъанын  эм саулай Шимал Кавказ федерал округда темирчилик  бёлюмюню айнытыуда да  магъаналыгъын   белгилегенди. Ол в РФ-ни Правительствосуну Председатели вольфрам-молибден къазгъан  комбинатны  СКФО-ну субъектлеринде  социал-экономика болумну игилендириу жаны бла беш  къыйматлы проектледен бирича тийишли кёргенин да   къошханды.  

Эсге сала айтсакъ,  Тырныауузда  вольфрам-молибден  къазгъан комбинатны жангыртыу бла байламлы ишлени чеклеринде,   жер тюбюнде рудник  эм жылгъа  1,5 миллион тонна продукция   жарашдыргъан  фабрика да ишленирикдиле.  

Бюгюнлюкде сагъынылгъан жумушлагъа  55,7 миллиард сом бёлюннгенди. Андан 46 миллиард сом къурулушха, производство объектлени ишлетирге къоратыллыкъды.
Проектни   «Ростех» къырал корпорация  бардырады, анга   ВТБ, ВЭБ.РФ банкла  эм  Кавказ. РФ айнытыу жаны бла  институт да къатышадыла.

Сагъынылгъан участокда къаллай бир магъадан  сакъланнганы  тинтилгенден сора, «Ростехни» бёлюмю «Эльбрусская горнорудная компания» биригиу  бла багъасына  келишгендиле эм  къазып башларча лицензия да берилгенди. 

Бусагъатда КъМР-ни   Правительствосу бла  «Ростех» бирлешип «Жол карта» жарашдырылгъанды. «Эльбрусметалл» акционер биригиуню таматасы   Антон Ким айтханнга кёре, проект эки кесекден къураллыкъды. Ол санда «Газпром» биригиуню Къабарты-Малкъарны  2021-2025 жыллада кёк отлукъ бла  жалчытыу программагъа тийишлиликде анга газ тартыллыкъды. Аны бла байламлы ишле келир жылгъа бошалыргъа керекиле.  Аны бла бирге энергокюч бла жалчытырча да  «Россети» биригиу бла келишим этилгенди.    Бусагъатда подрядчикле комбинатха баргъан  жолну 13 километрин жангыртып бошай турадыла.

- Проект  къыралда промышленностьну стратегиялы  сырьё бла тынгылы  жалчытыргъа онг  берликди.  Андан сора да, комбинатны тюрлю-тюрлю бёлюмлеринде 800-ге  жууукъ адамгъа ишчи жер табыллыкъды. Аланы асламысы  жууукъ элледе жашагъанла боллукълары уа бютюн къууанчлыды. Ол  уруну жаны бла проблеманы кетерирча ахшы къошумчулукъ этерикди. Аланы кёбюсюн  биринчи кезиуде  юйретирге да тюшерикди. Ол сорууланы  юсю бла  инвестор бла келишиннгенди,- дегенди КъМР-ни Промышленность, энергетика эмда сатыу-алыу  министри  Шамиль Ахубеков.

«Ростех» биригиу  Тырныауузда  вольфрам-молибден комбинатны ишин жангыртхандан  тышында,  алгъаракълада алтын, кюмюш  къазарча эм состар  ташны хайырланырча лицензия къоллу болгъанды. 

 Бусагъатда проектни бардырырча тийишли ишле башланнгандыла. Мында да  танг кесек адамгъа ишчи жер къураллыкъды, Элбрус районну инфраструктурасын игилендирликди  тёленнген налогла  жер-жерли эм республикалы бюджетлени да байыкъландырлыкъдыла.

Бизни корр.
Поделиться: