Жукъгъан аурууладан къорууланырча

Кёп болмай Нальчикде 1-чи номерли клиника больницасында биринчи Шимал-Кавказ регионла аралы илму-практика конференция ётгенди.  Аны магъанасы – къыралны жукъгъан аурууладан къоруулауну жалчытыргъады. Ол дагъыда микробиологланы «медицина микробиология» бёлюмге кёчюрюлгенлери бла байламлыды. Форумда жангы усталыкъгъа кёчюу къалай барлыгъын ангылатхандыла,  оборудование эм  аурууну тохташдырыу амалла бла да шагъырей этгендиле.  

Бюгюнлюкде къыралда биология жаны бла къоркъуусузлукъ баш жерни алады. Аны жалчытыу бла уа медицина микробиология жаны бла усталыкълары болгъанла - бактериологла, микрологла, паразитологла эм вирусологла - кюреширикдиле.
Бусагъатда биология жаны бла къоркъуусузлукъну  медицина микробиология белюм,  Роспотребнадзор эм  бир-бир медицина организацияла да  жалчытадыла. 

Бу жолгъу форум  Къабарты-Малкъарда бюгюннгю  лабораторияланы  къураргъа,  аланы бийик технологиялы оборудование  эм  билимли кадрла бла жалчытыргъа  себеплик этерикди.

Тышында да усталыкъларын аямай

Бюгюнлюкде Къабарты-Малкъардан анестезиологла Херсон областьни Скадовск районунда  борчларын толтурадыла. Ара больницада  юч реаниматолог-анестезиолог - Амир Конов (Нальчикни 1-чи номерли клиника больницасы), Арсен Мусаев (Диагностика ара) эм Ахматланы Руслан (Тубдиспансер) кеслерин аямай кюрешедиле.

Врачла муниципалитетде жашагъанлагъа эм башха жерледен къачаргъа тюшгенлеге да тийишли медицина болушлукъ тапдырадыла. Эки айны ичинде медикле иги кесек операция бардыргъандыла. Сёз ючюн, кюннге хар бирине алты-жети операция этерге тюшеди. Андан тышында,  реанимация бёлюмде саусузлагъа къарайдыла эм коллегаларына да сынамларындан юлюш этедиле. 

Саулай алып айтханда, бусагъатда  Херсон  областьда регионладан  жюзге жууукъ врач эм орта медицина персонал  ишлейдиле.