Ахшы тёрени андан ары бардыра

Нальчик шахарны администрациясында Юйюрню, сюймекликни бла кертичиликни  битеуроссей кюнюн къууанчлы халда белгилегендиле. Ары  юлгюлю юйюрле чакъырылып, алагъа  «Сюймеклик эмда кертичилик ючюн»  майдалла, грамотала да берилгендиле. Аны бла бирге  «Юйюр- 2023» деген битеуроссей конкурсну регион кесегинде  хорлагъанла да белгиленнгендиле. 

Къууанчлы жыйылыуну Нальчик шахарны администрациясыны башчысыны орунбасары  Мулид Макаев ачханды. Ол байрамны магъанасыны юсюнден къысха билдириу этгенди эмда ахшы юйюрлени белгилеу республикада ахшы тёреге айланнганын айтханды. «2008 жылдан бери  Нальчикде «Сюймеклик эмда кертичилик» майдал бла 280 юйюр саугъаланнганды.  Бюгюн да   ол ариу тёребизни уллу ыразылыкъ бла бардырабыз»,-дегенди.

ЗАГС-ны шахар бёлюмюню таматасы Валентина Шериева, юлгюлю  юйюрлени  алгъышлай, Ата журтубуз, республикабыз да аллай юйюрледен бай болгъанларын чертгенди. «Юйюр тутхучлу болса, къырал да кючлю болур!» деген сёз барды да, насыпха, къыралыбызда юйюр тёреле ёмюрледен бери да сакъланып келедиле. Бизни миллетледе уа ол хазнагъа бютюн бек сакъ болгъандыла. От жагъаны, тыпыр ташынгы жылыуу ёмюрлюк  байлыкъла болгъанларын ала дурус биледиле»,- дегенди ол.

Валентина Борисовна жаш адамланы жашау нёгерлерин иги сагъыш этип сайларгъа чакъыргъанды, ол заманда юйюрлери тутхучлу боллукъларын да эсгертгенди.
Тиширыуланы  республикалы биригиуюню таматасы Аулиат Каскулова уа жашлары бу кюнледе Ата журтну къоруулай, энчи аскер операциягъа къатышхан аналагъа бла аталагъа айланып, сабийлери хорлам бла сау къайтырларын тежегенди. «Барыбыз да аланы ашыгъып  сакълайбыз, акъылыбыз, жюрегибиз бла да ала блабыз»,- дегенди.

Андан сора да, ол  мындан эки юйюр Москвада бардырылгъан  «Юйюр-2023» битеуроссей конкурсда хорлагъанларын да билдиргенди.
Кесини алгъышлау сёзюн Тиширыуланы нальчик шахар биригиуюню таматасы Лидия Дигешева да айтханды. Аллай юйюрлени магъаналары уллу болгъанын чертип, алада ёсген сабийле ариу къылыкълы, билимлиле, жетишимлиле да болгъанларын эсгертгенди.

Андан сора  саугъалау башланнганды. Кёп жылланы бирге жашап, тутхучлу юйюр къурагъанлагъа, адепли, адежли да  сабийле, туудукъла ёсдюргенлеге  майдалла, грамотала да берилгендиле.  Аллай сыйгъа тийишли  болгъанланы араларында Мызыланы Александрны бла Ларисаны, Чеккеланы Борисни бла Рахиманы, Жетишланы Рашидни бла  Иринаны, Валера бла Лариса Канчукоевланы, Мухамед эмда Светлана Шахмурзовланы, дагъыда башхаланы атлары айтылгъандыла. Байрамгъа  ала  сабийлери, туудукълары, аладан туугъанла бла  келгендиле. 

Саугъаланнган юйюрлени баш иелерини бла юй бийчелерини бир-бирлери уа  байрамны къурагъанлагъа, аланы сыйларын кётюргенлеге да ыспас  сёзлерин назмула бла  айтхандыла. 
Байрамны ахырында Нальчикде 1-чи номерли музыкалы школда  юйреннген жашла бла къызла ариу ауазлары бла жыйылгъанланы къууандыргъандыла.