Этилген иш кёзге илинеди, этилликге да эс бурулса эди

Элледе этилген затланы, бир къауум жылдан  газетлеге къарасакъ тапмай къояргъа боллукъбуз. Жазылмай къалгъаны себепли. Тау эллеге эс бурулмайды деп айланнгандан не магъана? Сёз ючюн,  туугъан элимде Огъары Малкъарда чекчилеге жашар журтла, жангы ГЭС, андан токну ёзеннге тюшюрюрча ыз, биринчи номерли мектепни  тийресинде  ишленнген сабий сад, жол жанындагъы чыракъла, Къазакъланы Жюнюсню атын жюрютген орамда жангы чайыр жол, Маданият юйде тынгылы ремонт. Была къырал  программаланы хайырындан ахча бёлюнюп этилген жумушладыла. Энди уа  адамланы ырысхыларына этилген затла. Туура  Хаблада бла Мухолда эски межгитлени сюегендиле, элге кирген жерде ишлене тургъан, сора Боташлары жангырта тургъан тукъум къалала. Бери солургъа келген халкъ сюйюп ауузланыучу кафеле: «Тау эл», «Караван» «Старая Балкария», «Орлиное гнездо», «Алтуу», Уштулудагъы солу юйле. Шёндю да уллу кюч салып, Мухолну кёпюрюн ары элтген жолну эки жанындан да бетон хунала сала турадыла. Былайгъа да  къырал бёлюннген ахчагъа къурулуш ишле барадыла. Бу жангылыкъланы кёбюсюн газет окъуучула биринчи эшитедиле десек ётюрюк болмаз.  «Старая Балкария» кафени иеси Мамайланы Солтан элге музей да ишлейди.

Энди огъары малкъарлыла бахчаларында ёсдюрмеген не барды? Бирле битеу бахчаларына туяла салып, башхала теплицалада эемишле ёсдюрюп, айранны шешалагъа къуюп  сатып, ол неди, мырзай этип хайыр тюшюредиле. Ишхилди жыйып, якла тутуп мадар этгенле уа алай кёп тау элде болмазла.

Сора арт заманда бир иги жумуш чыкъгъанды, шёндюгю тёлю кёчгюнчюлюкге дери ата-бабалары жашагъан юйлени жангыртадыла. Жангоразланы  Къыралбий эрттегили таулула къалай жашагъанларына ким да сукъланырча журтну Кюнлюмде ишлете турады.

Онг чыгъып эл орналгъан жерде Черек сууну чегет жагъасына хуна этилсе къалай иги боллукъ эди. Ансы бир кезиуде къабырла болгъан жерде жар оюлуп,  шёндю уа Жангоразланы Ахияны атын жюрютген (халкъда жюрюген аты Къыйыр орам) орамда суу ашай кетип жар оюлуп, Чочайланы  Солтанны мал оруну оюлгъанды, юйюню ичинден къабыргъалары жарылыпды. Битеу палах  а  сууну Мухол ГЭС-ге бу тийреде алгъанлары ючюн черекни бери бургъандыла. Кесим да бу орамда ёсгеним себепли, сора эллилени къышлыкъгъа малларын былайтын къыстаучуларын, сабийле да мектепге къысха жол бла жюрюгенлерин эсге алсакъ, былайтын жол не жаны бла да керекди.