Бу айда кюч алгъан законла

Хайырланыучулагъа берилген кредитлени тёлеулерин азайтыу, пенсияланы женгил жарашдырыу, «Узакъдагъы Востокда гектар» программада жангычылыкъла – аланы эмда быйыл июльда кюч алгъан башха законланы юсюнден Объясняем.РФ порталда айтылады.

Документлени налог органнга онлайн халда берирге боллукъду

Сиз энди «Госуслуги» порталгъа кирип, аланы Федерал налог службагъа жиберирге неда андан алыргъа боллукъсуз. Алай этерча бу порталда анга эркинлик берирге тийишлиди.

Хайырланыучулагъа берилген кредитлени ставкалары тюшерикди

Аны кюнлюк ставкасы 1 процентден 0,8 процентге тюшерикди. Биржыллыкъ ёлчеми уа 365 угъай, 292 процент боллукъду. Алай бла артыгъы бла тёленирик ахчаны мардасы, алыннган сомла бла тенглешдиргенде, 150 угъай, 130 процент бла чекленирикди.

«Узакъдагъы Востокда гектарны» женгилирек алыргъа жарарыкъды

Арктиканы тийрелеринде эмда Шималда, Сибирьде, Узакъдагъы Востокда жер юлюш алыргъа сюйгенле, келишимни проектине 60 кюнню ичинде къол салаллыкъдыла. Жерни хайырын кёрюрге онг болмаса уа, анга эркинликден чыгъаргъа (бир кере) жарарыкъды. Программагъа къатышыргъа сюйгенле документлерин «Госуслуги» портал бла жиберирге боллукъдула. 

Пенсияны жарашдырыу женгилирек болгъанды

Аны алыргъа сюйгенле къагъытларын жыйып айланырыкъ тюйюлдюле энди. Пенсияны жарашдырыу болжалы да къысхартылгъанды.

Энди къырал эмда муниципал архивле адамланы юсюнден информацияны тюзюнлей Социал фондха жиберип турлукъдула.

Социал болушлукъну саулай къыралда бир стандарты кийириледи

Энди регионланы барында да бирча социал болушлукъ берилликди. Сёз ючюн, жашау журт-коммунал жумушланы неда сабий садикни багъасын тёлерге компенсацияла эмда башха затла. Болушлукъ излегенле аны юсюнден «Госуслуги» порталда билдирирге боллукъдула.

«Ахшылыкъны тёгереги» Фонд дарманланы НДС тёлемей ташырыкъды

Къыйын эмда бек аз тюбеучю аурууладан къыйналгъан сабийлеге изленнген дарманла налогдан эркин этиледиле. Аны себепли ала учузуракъ болургъа керекдиле.

Татлы суулагъа налог

Бал туз, андан этилген сироп неда бал къошулгъан суулагъа акциз салынырыкъды. Аны ёлчеми: бир литрге - жети сом.

Быллай сууну литрини ондан биринде беш граммдан кёп углевод эмда 1,2 процентден аслам этил спирт болмазгъа керекди. Жемиш суула, нектарла, морсла уа быллай налогдан эркин этиледиле.

Акцизни хатасындан татлы сууланы багъалары аз-маз кётюрюллюкдюле, аны себепли адамла аланы азыракъ ичип башларыкъдыла. Ол а саулукъгъа игиди.

Улбашланы Мурат хазырлагъанды.
Поделиться: