Жигер ана, огъурлу ынна

Тутхучлу,  толу да, адепли да юйюр къайсы къыралны да тутуругъуду, байлыгъыды десек, терс болмаз. Бютюн да бизни къыралгъа анга уллу магъана буриледи. Юйюрню, сюймекликни эмда кертичиликни кюню  тохташдырылгъаны да анга шагъатлыкъ этеди.

Бизни республикада юлгюге тутарча юйюрле, насыпха, бек кёпдюле. Ма аллай бири бла шагъырей этерге сюеме бюгюн. Ол кеси да  малкъар халкъ кёчгюнчюлюкден  туугъан жерине къайтхандан сора къуралгъанды.   Чеченланы Мухадин бла Маймулат   1963 жылда байлагъандыла къадарларын. Къашхатауда  кёпге дери унутулмагъан биринчи комсомол той да аланыкъы болгъанды.

Биринчи кюнден окъуна  экиси да бир бирни ангылап, бир бирге билеклик эте, жарым ёмюрню  жашагъандыла, элде кёп юйюрлеге юлгю болгъандыла. Ала алты сабий, сегиз туудукъ ёсдюргендиле, энди уа ынна туудукъларындан  туугъанланы  да, тобукъларына олтуртуп, къубултады. Сабийлени барысы да  бийик билим алгъандыла,  ишлеген жерлеринде бет жарыкълы болуп, жамауатха хайыр келтиредиле. Анга уа ата-ана да бек къууаннгандыла.

2014 жылда уа жууукъла, тенгле, туугъанла, туудукъла да  аланы «алтын  тойларын»  этгендиле. Сабийлери ата-аналарына этген керти да аламат байрам-саугъа  эди. Андан сора бир жылдан а, жарсыугъа,   уллу юйюрню баш иеси жашауун алышханды…

Мухадин бла Маймулат  «Къызыл Малкъар» колхозну къураугъа къатышханладан бирлери болгъандыла.  Жаш машина жюрютгенди,  къыз  а –ийнек сауучу болуп уруннганды.  Маймулатны эрикмей-талмай ишлегенин кёрюп, таматала аны  сют-товар ферманы башчысына салгъандыла.  Алай ол ийнек саугъанын да къоймагъанды,  кеси биринчи болуп къалмай,  жаш тёлю-комсомол бригадасы да  айырмалы эди.

Маймулат КъМАССР-ни  Баш Советини депутатына эки кере эмда  Совет Союзну алтынчы чакъырылыууну  депутатына  да айырылгъанды. «За трудовую доблесть» майдал бла саугъаланнган ол биринчи таулу тиширыу эди.  «Аналыкъны» 1-чи, 2-чи, 3-чю даражалы майдаллары бла да белгиленнгенди. Бет жарыкълы уруннганы ючюн  кёп кере махталгъанды.  Аланы эллиле бюгюн да атларын уллу хурмет бла сагъынадыла, кёплеге иш бла, сёз бла да эс тапдырып, болушуп  тургъанларын унутмайдыла.

Юйюр от жагъаны сакълай, Маймулат бюгюн да сабийлерине, аладан туугъанланы хар бирин да   огъурлу  сёзлери бла жапсарады,  насийхаты бла юйретеди. Жашлары, къызлары, аладан туугъанла да  ананы, ыннаны эртте заманладан эсгериулерине да тынгыларгъа бек сюедиле.

Бу кюнледе Маймулатны  туугъан кюнюн  киеуле, келинле, жашла, къызла, туудукъла, аладан туугъанла, жууукъла, ахлула, уллу  юйге, кенг арбазгъа жыйылып,  хар замандача, белгилерикдиле. Бу огъурлу анагъа, ыннагъа  биз да узакъ ёмюр, саулукъ, эсенлик тежейбиз.
Холаланы Марзият.

 

Поделиться: