«Заман» газетни эрттеден бери жыяма»

Аккайланы Жаннет, Зупарны къызы, Яникойну почтасында юч жылны ишлейди, элни жер-жерли самоуправлениясыны депутаты да болады. Анга жумушлары бла келгенлеге жарыкъ тюбейди, хар бири бла ариу сёлеше, ала артда къууанып кетерча эте биледи.

Жаннет Къабарты-Малкъар къырал университетни Тарых-Фиология факультетин тауусханды, малкъар тилден бла адабиятдан устаз деген усталыкъны алгъанды.

- Почтада ишлеген адам кетип, ол бир ауукъ заманны жабылып тургъанды. Элни жамауаты манга, депутатхача, почта ишлемегени ючюн къыйналгъанларын, жумушларын этерге Каменкагъа, Шалушкагъа барыргъа тюшгенин жарсып, айта-айта тургъандыла. Ол себепден, келип, мында ишлерге таукелленнгенме. Сюйюп ишлейме, ишими жаратама, адамла ыразылыкъларын да билдире турадыла, ол а, сёзсюз, манга да кёл этдиреди, - дейди ол.

Почтада Жаннет адамладан письмола, посылкала алады, аланы керек жерлеге ашырады, коммунал жумушла ючюн тёлеулени этеди. Газетлеге, журналлагъа жазылыугъа да сакъды. Айтханыча, миллет тилледе изданияланы асламысында абадан адамла алыргъа сюедиле, ала бола тургъан ишлени юсюнден жангылыкъланы газетден биледиле. Жаш адамла уа  телефонларында Интернет бла кирип, окъуп къоядыла. «Мен, почтальонларыбыз да -  Светлана Буркова, аны анасы да почтада ишлеп кетген эди, Елена Мягкова бла Шахмырзаланы Нашурум - бир онбеш газетни кесибизни ахчабызгъа жаздырабыз. Аны да газетни окъургъа сюйюп, алай аны алыргъа онглары болмагъан адамланы къууандырыр ючюн. Газетни кесини юсюнден айтханда, ол миллетибизни, тилибизни кюзгюсюдю. Ана тилибизни сакълау – аны эм уллу жетишимиди, сыйлы борчуду», - деп чертеди Жаннет Зупаровна. 

Ол кетирген шартлагъа кёре, бусагъатда газетге жазылгъанланы саны аз-аздан ёсе барады. Аны эндиге дери бир кере да алмагъанла окъуна газетибизге билеклик этерге сюебиз деп, аны магъанасын ангылап, жазылыргъа беш-алты адам келгендиле. Ала артда, биз эндиге дери уа «Заманнга» нек жазылмай тургъанбыз деп, сюйюп окъугъанларын да билдиргендиле. Аны бла бирге эрттегили заманланы юслеринден кёбюрек материалла жазылса сюйгенлерин да айтхандыла. Газет тюрсюнлю болгъаны да жамауатны къууандырады, алай ол кёзге да бегирек илинеди, ариу кёрюнеди.

Миллет бла байламлы кёп затла, аны тарыхы, маданияты, юлгюлю адамлары – аланы барысыны юсюнден да биз жангыз газетден билликбиз, аны асырап да сакълаяллыкъбыз, - деп чертеди Жаннет. - Сёз ючюн, мен «Заманны» 2009 жылдан бери чыкъгъан битеу номерлерин жыйып турама, манга алгъа жыллада не болгъанын олтуруп окъургъа бек сейирди, хычыуунду. Бусагъатда анда ахшы жанына тюрлениуле болгъанын да айталлыкъма. Бир заманда ол официал халгъа бурулуп къалгъан эди, арт кезиуде уа адамланы юслеринден кёп басмаланады, аланы юслеринден окъургъа бек сейирди. Газетибизни сакъларгъа, багъаларгъа керекбиз.