Табийгъатыбызны аламатлыгъын кёргюзте

Кёп болмай Къабарты-Малкъарны къырал бийик тау заповедниги «Россей, сюеме сени кийик табийгъатынгы» деген Нальчикде Курортла юйюнде кёрмюч къурагъанды. Андагъы ишле заповедниклени келечилери эм профессионалла  тюшюрген суратладыла. Анга КъМР-ни Табийгъат байлыкъла эм экология министерствосуну, Черек муниципал районну администрациясыны келечилери  эм башхала къатышхандыла.  
Мындагъы юч жыйырма суратда Къызыл китапха жазылгъан жаныуарланы, битимлени, тамаша табийгъатны кёрюрге онг болгъанды. Кёрмюч онтогъузунчу сентябрьге дери барлыкъды. Андан сора уа Къашхатауну Культура юйюнде кёргюзтюллюкдю. 16 октябрьден 30 октябрьге дери уа анга заповедникни Визит-Арасында къараргъа онг боллукъду.   
Къабарты-Малкъарны бу заповедниги 1976 жылдан бери аз тюбеген жаныуарланы, битимлени, агъачланы, сууланы сакълау жаны бла уллу иш бардырады. Быйыл Россейде Экологияны жылыча белгиленнгени уллу къууанчды. Ол шарт жамауат табийгъатны сакълаугъа уллу кёллю болмагъанын кёргюзтеди.
Бюгюлюкде дунияны кёп жеринде болумгъа къайгъы этерчады. Къудуретни жаланда байыкъланыр умут бла хайырланыргъа жарамайды. Кеч болгъунчу анга тийишли эс бурургъа керекди. Биз анга сакъ бола билсек, ол да бизни мындан арысында къууандыргъалай турлукъду.

 

Тогъузаланы Лейля, Къабарты-Малкъар Къырал бийик тау заповедникни таматасыны орунбасары.

Свежие номера газет Заман