Элде билим бериуню айнытхандыла

Сиз кёрген сурат озгъан ёмюрню жетмишинчи жылларында алыннганды. Мындагъыланы биринден къалгъанлары барысы да Бабугентни Батчаланы Роза атлы битеулю билим берген мектебини устаз коллективини бир къауумуду. Жарсыугъа, энди аланы асламысы дунияларын да алышхандыла. Бюгюнлюкде жаланда  школну ол замандагъы директору Къужонланы Алийхажини къызы Шабатукъланы Налдюз сау-эсенди.

Алайды да, суратда орта тизгинде сюелгенледен сол жанындан экинчи тиширыу Налдюз Алихажиевнады. Ол жаш тёлюню окъутуугъа бла юйретиуге отуз жылын бергенди. Иги кесек заманны уа мектепге таматалыкъ этип тургъанды. Болдургъан жетишимлери ючюн а РФ-ни халкъгъа билим бериуюню отличниги деген даражалы атха да тийишли болгъанды.

Суратдагъыладан школгъа дагъыда бардыла директорлукъ этип тургъанла. Аладан бири Ксаналаны Ибрагимди, ол ал тизгинде олтургъанланы орталарындагъы эр кишиди. Кеси да урушну ветераны болгъанды. Къызыл жулдузну ордени бла эки кере, башха майдалла бла да саугъаланнганды. Жамауат аллында сыйы-хурмети жюрюген адам болгъанды.

Дагъыда бир кезиуде мектепге таматалыкъны Бёзюланы Магомет этгенди. Суратда экинчи тизгинни ортасында сюелипди. Ол школда военрук болуп да тургъанды. Уллу Ата журт урушха къатышхан ветеранларыбыздан эди. Ол да Къызыл жулдузну ордени бла саугъаланнганладан болгъанды. Бир кезиуде элни администрациясына да башчылыкъ этгенди. Жамауат аны окъуулу, халкъгъа жарагъан адам болгъанын бюгюнлюкде да унутмайды.

Мектепге таматалыкъ этгенледен бири уа, андан сора да, Каркаланы Татаркъанды. Ол огъарыда сюелгенлени онг жанындагъы эр кишиди. Физика дерсни кёплеге сюйдюрген билимли устаз эди. Аны къатындагъы уа Аттоланы Якубду. Ол а жаш тёлюню аслам жылны ичинде физкультурагъа бла сурат ишлерге юйретгенди. Ишинде бет жарыкълы болгъаны ючюн а КъМР-ни сыйлы устазы деген даражалы ат бла саугъаланнганды.

Биринчи тизгинде олтургъанладан онг жанындан экинчи Башийланы Аминат немис тилге эм алгъа кеси аллына тюшюнюп, артда КъМКъУ-ну роман-герман филология факультетинде билим алгъанды. Артда кеси бошагъан школгъа къайтып, мында сабийлени тыш къыраллы тилге отуз жылдан асламны юйретгенди.

Биринчи тизгинни сол жанындан биринчи уа Каркаланы Локъманды. Ол кёп жылны труд дерсден окъутуп тургъанды.

Экинчи тизгинде сол жанындан биринчи сюелген тиширыу а Асанланы Елизавета Батчаланы Каммойну къызыды. Талай заманны школда директорну окъутуу эмда юйретиу жаны бла орунбасары болуп тургъанды. Орус тилден бла адабиятдан ол берген дерсле бизни классыбызны, бирсилени да эслеринде къалгъандыла. Аны усталыкъ даражасын, хунерлилигин, ариу къылыгъын унутхан, айхай да, къыйынды. Аны сунмай тургъанлай жашаудан кетгени да окъуучуларына, аны таныгъанлагъа, билгенлеге да къыйын кёрюннген эди.

Олтуруп тургъанлай онг жанындан биринчи уа Османланы Георгийди. Ол тарыхдан дерсле бергенди. Окъуулулугъу, билимлилиги бла да айырмалы болгъанды. Аны алайлыгъын сезе, сабийле да анга энчи хурмет этгендиле. Ол кеси да белгили адамыбыз Темирбашны уланы эди.

Сагъынылгъан тизгинни сол жанындан экинчи уа Къазийланы Мариямды. Халкъыбыз кёчгюнчюлюкден артха къайтхандан сора КъМКъУ-ну орус-малкъар бёлюмюнде билим алгъан биринчи курс бла бирге окъугъанды. Артда Бабугентни школунда, элде ол кезиуледе орналгъан онунчу номерли интернатда да орус тилден бла литературадан дерсле берип тургъанды. Бу жаны бла эм окъуулу эмда кючлю устазладан бирине саналгъанды.

Экинчи тизгинде онг жанындан биринчи Нёгерланы Сафарды. Автоделодан аслам жылны окъутуп тургъанды, мектепни завхозу да болгъанды. Аны къатындагъы тиширыу Ксаналаны Раяды (Ибрагимни юйдегиси). Ол кёп заманны элде почтада ишлеп, жамауатдан ыразылыкъ да тапханды.

Школгъа бирсиле таматалыкъ этген заманны кёрмегенбиз. Бизге мектепге Налдюз Алихажиевна башчылыкъ этген кезиуде окъургъа тюшгенди. Анга уа, белгилегенибизча, Елизавета Каммоевна да билеклик эте (завуч), экиси да мектебибиз жаланда районда угъай, республикада да ал сатырда болуруна къайгъыргъанларына, тийишлисича юлюшлерин къошханларына шагъатбыз.

Заманны саркъыуу, табийгъатны жоругъу алайды жашауда. Асламысы дунияларын алышхан эселе да, аланы къолларында окъугъанла бу устазланы, элибизни, мектебибизни да айныууна къыйын салгъан бирси педагогланы да унутмайбыз. Ала элибизде хурметлери жюрюген, районда, республикада да таныулу адамладыла. Дунияларын алышханлагъа – жаннет, Налдюз Алихажиевнагъа уа саулукъ, узакъ ёмюр, монглукъ да тилейбиз.