Ишин билген кеси жеринде болса

Май районну Александровское станицасыны Маданият юйюню таматасы Жансуйланы Кулистан бла танышхан кюнден бери да ол ишин къалай тынгылы бардыргъанын кесим кёрюп турама. Кёрген неди, бир-бир мероприятияларына чакъыргъан окъуна этеди. Республиканы 100-жыллыгъын белгилегенде Майский шахарда былагъа таулу къош этерге болушхан эдим. Къысхасы, тынч бахчамы ишлерге къоймайды. Станицада бахчамы ишлей тургъанлай, былтыр маданият юйге ремонт этген жашланы Уяналаны Хусейинни, Каркаланы Мухамматны, Абшаланы Муслимни, Замир Кушховну жиберди. Была бизни юйде фатаргъа тохтадыла.

«Жашла бек тынгылы ремонт этгендиле, сау болсунла», - деди Кулистан, биз ушагъыбызны бардыра туруп.

Быллай тынгылы ремонт маданият юйню 1976 жылда хайырланыргъа берген кюнден бери да этмеген эдиле. Ремонтну «Культура» деген проектге кёре бардыргъан эдиле.  15 миллион сом къоратылгъанды ары. Бу ахча юйню башын толусунлай жабаргъа жетмеген эди да, 2,5 миллион сомну Май районну бюджетинден алыргъа тюшгенди. Ичине, тышына ремонт этгенден сора да, эшик, терезелени да алышхандыла.

Бюгюнлюкде мында 22 кружокга 400 адам жюрюйдю. Энди алагъа уллу, гитче да жюрюгенин чертирге керекди. Сёз ючюн, 45 жылдан таматала «Станица» халкъ къазакъ жырны хоруна, «Ладушка» жыр къауумгъа, «Юйюр» тиширыу клубха, эм къазакъ клубха жюрюйдюле. Сабийле тепсерге «Смайлики», «Калинка», «Непоседы», жырларгъа «Сириус», «Светлячки», «Искорки», «Поющие сердца» къауумлада юйренедиле. Сахнаны сюйгенле уа «Успех» театр студияда  салыннган оюнлагъа къатышадыла. «Моя станица» краевед, «Молодая семья», «Мы избиратели нового века», «Молодёжная среда», «Мир лекарственных растений» клублагъа да кёп жаш адам жюрюйдюле.

Эллилени «Краеведческий казачий клуб» интернет клублары барды. Маданият юйде не жумушла этилгенин интернетде кёрюрге боллукъду.

Бу къадар ишни мында ишлеген сегиз адам тамамлайдыла. Станицаны библиотекасы, музейи да аланы хайырындан сакъланнгандыла.

Жансуйланы Кулистан Нальчикде педагогика училищени бошагъандан сора мындагъы мектепде башланнган класслада 1997 жылда окъутуп башлагъан эди. Маданият юйде уа 2003 жылдан бери ишлейди. Москваны къырал ачыкъ педагогика университетин ПМНО факультетин да ишлей тургъанлай бошагъанды. Окъуу башланнган классланы устазы болгъанлыкъгъа, кеси жерин маданиятда тапханды. Аны башчылыгъы бла республиканы 100 жыллыгъын белгилей туруп, фахмулу сабийле бла Черек, Зольск, Терк районлада, Прохладный, Майский шахарлада да болгъандыла. «Кавказ оюнла» Грозный, Назрань, Махачкъала шахарлада бардырылгъанда да станицачыла алагъа тири къатышхандыла.