Умутландыргъан гёжефлени гюрбежиси

Яникойда спорт араны къууанчлы халда ачылыуу былтыр 28 мартда, Малкъар халкъны Жангырыу кюнюнде, болгъанды. Анга башчылыкъны Айтекланы Сагид этеди.

Спорт комплексни ишлерге башламчылыкъны элчиле этгендиле, ары дери сабийле культура юйню тюбюнде къатысында юйренип тургъандыла. Аланы бу тилеклерин предпринимательле къабыл кёрюп, араны ишлеп башларгъа ахча жыйгъандыла. Республиканы Башчысы Чегем районда ишчи жолоучулугъуну кезиуюнде болгъанында, элчилени бу излемлерини магъаналылыгъын чертип, республикалы бюджетден 10,6 миллион сом бёлюрге буюргъанды, муниципалитет да 6 миллионну бергенди, аны къурулушуна битеу да 18 миллион сом къоратылгъанды.  

Араны къууанчлы халда ачылыууна республиканы Башчысы, белгили гёжефле, Олимпиаданы чемпионлары бла призёрлары, жаш спортчула, элчиле да жыйылгъан эдиле. Аланы алгъышлай, Казбек Коков комплексде юйренирик гёжефле, тюрлю-тюрлю эришиуледе жетишимли болуп, туугъан жерлерине, республикаларына, саулай да къыралларына махтау келтирирлерине ийнаннганын айтхан эди. Байрамгъа аталыб а, эркин тутушуудан, боксдан бла гитче-футболдан сабий-жаш тёлю спорт турнирле да къуралгъандыла.

Спорт ара 600 квадрат метр жерни алады, мында универсал спорт эм тренажер залла, медицина ишчилени эм тренерлени кабинетлери, спортчула кийинирча эм жууунурча жерле бардыла, тутушуу, бокс, теннис эм спортну талай башха тюрлюсюнден жараула бардырыргъа боллукъду. Бюгюнлюкде мында боксха бла эркин тутушуугъа юйретедиле, ара ыйыкъгъа алты кюнню ишлейди. Жараулагъа боксдан-эллиге жууукъ, тутушуугъа да жюз адам жюрюйдюле, аланы асламысы окъуучуладыла.  Спортчуланы кёбюсю Яникойда жашайдыла, къоншу элледен – Шалушкадан, Звездныйден, Нальчикден келгенле да бардыла. Юйретиу хакъсызды. Жаш гёжефле бла юч тренер – Ажоланы Асадуллах, Къулийланы Заур, Жанатайланы Руслан – ишлейдиле. Ала сынамлы, ишлерин билген адамладыла, спортчулары жетишимли болурларына, аны бла бирге уа ала ариу халли болуп ёсерлерине да къайгъырадыла. Жарау этгенлени араларында абаданла да бардыла, ала эришиуледе хорлар умут бла угъай, саулукъларын кючлер, къарыуларын ёсдюрюр мурат бла келедиле. Алай бла спорт комплекс элни жаш тёлюсюн, абаданланы да саулукълу жашау бардырыргъа кёллендирген, хорламлагъа итиндирген арады. Мында эришиуле да ётдюрюледиле, алгъаракълада, башха регионладан, ол санда Дагъыстандан, Шимал Осетия-Аланиядан, Къарачай-Черкесден спортчула да къатышып, боксдан матч тюбешиуле бардырылгъандыла.

  Спортчуланы жетишимлерини юсюнден айтханда, тутушуу бё         люм ачылгъанлы алай кёп заман бомайды, алай хорламла уа бардыла. Боксха иги кесек заманны юйретгенлери себепли, мында жетишимле асламыракъдыла. Россейни биринчилигинде, округ, республика даражалы эришиуледе, ведомстволу аралы турнирледе хорлагъанла эм саугъа жерлеге чыкъгъанла асламдыла. Юлгюге Шекерланы Инал, Къонакъланы Амир, Биттирланы Ибрагим, Ботталаны Суфиян, Деуаланы Амирлан бла Амирхан, Газаланы Сулейман бла Эмирни келтирирге боллукъду. Бусагъатда Краснодарда боллукъ битеуроссей эришиуге хазырлана турадыла.

Сагид айтханыча, элде спорт комплекс ишленнгени сабийлени юйретиуге, ала бош заманларын хайырлы ётдюрюрча этиуге уллу себепликди. Нек дегенде, спорт  инсанны низамгъа, жууаплылыкъгъа, чурумладан къоркъмай, муратха жетерге юйретеди, чыныкъдырады. Ол Чегем районну спорт школуну директору Руслан Кадыкоевге, элчилеге да дайым болушлукъ этип тургъанлары ючюн ыразылыгъын билдиреди.