Регион ыйыкъны программасы байды

Къырал Думаны депутаты Виктория Родина «Единая Россияны» халкъ программасыны чеклеринде тынгылы жангыртылгъан объектлени болумлары бла шагъырейленнгенди. Ол партияны регион бёлюмюню келечилери бла бирге Прохладна районнга баргъанды.  

Къонакъла Красносельский эм  Ново-Полтавский элледе школланы къурулушларында болгъандыла.     Ново-Полтавский элни башчысы Дмитрий Махонин айтханыча,  анда жашагъан эки минг адамдан 20 проценти сабийледиле. 

- Мында жангыз школ 1965 жылда ишленнгенди, андан бери бир кере да тынгылы жангыртылмагъанды. Мекямда магъаналы жумушла бардырылгъандыла. Ол шёндюгю излемлеге келишдирилгенди, ол санда башы, терезелери, эшиклери алышыннгандыла. Тышы эм ичи сюртюле турадыла. Аны бла бирге ток, суу, канализация ызла да жангыртылгъандыла. Тапландырыу жумушла бардырылгъан кезиуде уа сабийле Прималькинский элге жюрютюлгендиле,-деп билдиргенди ол.

Виктория Родина КъМР-ни Башчысыны себеплиги бла быйыл республикада 210 объект тынгылы жангыртылгъанын белгилегенди.  Алагъа битеулю къоранчла 7 миллиард сомгъа жетедиле. Ол санда Прохладна районда, партияны халкъ программасына   тийишлиликде,   Красносельскоеде школ, Солдатскоеде  сабий сад ишлетиледиле,   Екатериноградский, Ново-Полтавское эм  Благовещенка элледе школла тынгылы тапландырыладыла, Лесной эм  Малакановский элледе уа  билим бериу учрежденияланы ырысхы-техника мюлклери жангыртыладыла.  Районну юч школунда «Точка роста»  къураллыкъды. «Бизни устазларыбыз быллай жангычылыкъла ахыр 30 жылны ичинде болмагъанларын айтадыла»,-дегенди депутат.

 Регион  ыйыкъны чеклеринде Виктория Родина Благовещенка элде  социал объектлени болумлары бла шагъырей боллукъду эмда инсанланы тилеклерине бла тарыгъыуларына тынгыларыкъды. Дагъыда ол саулукъларына кёре чекленнген онглары болгъанланы  финанс билимлерин игилендириуню соруулары жаны бла тюбешиуле бардырлыгъы белгиленеди.