Къоранчланы азайтыуну амалы

Къабарты-Малкъарны Эл мюлк министерствосуну келечилери районлагъа барып, аграр бёлюмде страхование этиу къыйматлы болгъанын ангылатадыла. Кезиулю кенгешлерин кёп болмай Черек районда бардыргъандыла, деп билдиргендиле министерствону пресс-службасындан.

Аны битимчилик эмда битимлени къоруулау бёлюмню башчысы Заурбек Кандроков айтханыча, страхование этмей, шёндюгю агропромышленность производствону болур амалы жокъду. Нек дегенде экономиканы бар бёлюмлеринде эл мюлк бегирекда къоркъуулугъа саналады. Башхача айтханда, салгъан къыйынынгы хайыры чыгъар деп толу ышаныу жокъду. «Страхованияны уа бир игиси –мюлклени къоранчларын жабаргъа себеплик этеди ол», - дегенди Кандроков.

Къабарты-Малкъарда бу иш бла эки компания кюрешеди: «РСХБ-Страхование» эм «ВСК». Ала Россейни агростраховщиклерини Миллет биригиуюне киредиле. Аланы регионда бёлюмлерини башчылары Беслан Пагов бла Гусман Мидов да къатышхандыла кенгешге. Къонакъла жыйылгъанлагъа ишлерини юсюнден толу хапар айтхандыла, къырал берген болушлукъ не жаны бла хайырлы болгъанын да билдиргендиле.

Сёз ючюн, мирзеу ёсдюрюучюлеге субсидияла азайтып (0,7 коэффициент бла) алай бериледиле. Аграр страхование этгенле уа ахчаны толусунлай аладыла. Къырал болушлукъ гектар сайын тергеле эсе, страховой келишимлери болгъанлагъа субсидия эки кереге кёбейтиледи.

Кенгешде айтылгъаныча, къырал болушлукъ бла страхование этерге сюйгенлеге, келишимде кёргюзтюлген багъаны экиден бирин къырал жабады. Бизни республикада быйыл ол жумушха бюджетден 4,1 миллион сом бёлюрге оноулашхандыла. Аны эмда башха темаланы юслеринден жыйылыугъа къатышханлагъа хар нени да жик-жиги бла ангылатхандыла, сорууларына да жууапла бергендиле.