Ууну андан ары сатаргъа хазырланнганды

Быйыл 26 июньда оператив-излеу жумушла толтургъан кезиуде КъМР-де МВД-ны наркотиклеге къажау бёлюмюню къуллукъчулары Нальчикде Дагестанский орамда алгъын да башы сюдлюк болгъан 35-жыллыкъ эр кишини тохтатхандыла. Аны тинтген кезиуде кёнчегини сол хуржунунда чулгъам тапхандыла. Аны ичинде 49 гитче чулгъамчыкъла  бар эдиле. Эр киши айтханыча, алада наркотик букъдурулгъанды. Ол аны интернетде  сатып алгъанды эмда ууну   андан ары сатаргъа мурат этгенди.

Ызы бла ол наркотиклени букъдургъан бир ненча жерни кёргюзтгенди, алада полициячыла юч чулгъамны тапхандыла. Тинтиуледен ачыкъланнганыча, ол героинди,  ауурлугъу 20,11 граммгъа жетгенди.

Эр кишиге РФ-ни УК-сыны 30-чу статьясыны 3-чю кесегине эмда 228.1-чи статьясыны 4-чю кесегини «г» пунктуна кёре терслеу материалла ачылгъандыла (кёп санда наркотиклени законсуз сатаргъа кюрешгени ючюн).