Спортчуларыбызда – сегиз майдал

   Нальчикде «Универсальный» спорт комплексде самбодан бла аскер самбодан Россейни чемпионатына айырыу эришиуле болгъандыла. Алагъа СКФО-ну битеу регионларындан 338 спортчу къатышхандыла. Турнир эки кюнню ичинде бардырылгъанды, алгъа гёжефле аскер самбода сынашхандыла, экинчи кюн а – спорт самбода.
    Къабарты-Малкъардан спортчула 8 майдал къытхандыла. Аскер самбода «алтынны» Хабибула Мовсаров (100кг.) алгъанды. Спорт самбода эр кишиледе Ислам Шогенов (90кг.) бла Ислам Абазов (100+кг.) биринчи жерге чыкъгъандыла, Астемир Накоев (100+кг.) ючюнчю болгъанды. Тиширыулада алтын майдалла бла Гузиланы Зурият (48кг.), Луиза Харченко (52кг.) бла Фатимат Артикова (60кг.) къууандыргъандыла, Гуппойланы Алина (52кг.) доммакъ майдалны къытханды. Ала барысы да энди Россейни чемпионатына къатышырыкъдыла, ол а 2019 жылда 1-5-мартда Казаньда боллукъду. Спортчуланы тренерле Б. Ошхунов, М. Пченашев, М. Боготов, О. Саральпов, А. Майсурадзе, А. Хапай, Т. Мирзов, Р. Ким, Э. Купов, А. Хамбазаров юйретедиле.