Элле айбат болурча

 Бу кюнледе Элбрус районда «Эл жерлени комплекс халда айнытыу» къырал программагъа кёре игилендириу ишле къыстау барадыла.

Аны  кезиуюнде Тырныауузда Маданият юй жангыртыллыкъды, Тегенеклиде таза суу баргъан быргъыла алышынырыкъдыла, Элбрус элде уа гитче спорт комплек, бла юч жюз  адамгъа Маданият юй ишленирикди.

Саулай алып айтханда, сагъынылгъан проектлени тамамларгъа 231 миллион сом къоратыллыкъды. Андан асламысын неда 222,2 миллион сом федерал бла республикалы бюджетледен бёлюнюрюкдю.

Бусагъатда объектлени барында да тийишли  жумушла башланнгандыла.  Графикге кёре спорт комплекс бла   Маданият юй экинчи  жылны ахырына битерикдиле.  Башха къурулушла уа быйылдан кеч къалмай хазыр боллукъдула.

Сагъынылгъан къырал программаны КъМР-ни Эл мюлк министерствосу бардырады эм болжалдан кеч къалмай толтурулуруна  кёз-къулакъ болады.