«Спортну юйретиу магъанасы уллуду, анга къыралла аллай бир магъана бергенлери да аны ючюндю»

- Бу умутугъузну билим бериу министерство къабыл кёрсе да, сёз ючюн, элледе мектепледе сабийлени юйретирге хазыр тренерле уа табылырламы?

- Бийик квалификациялы тренерлерибиз кёпдюле, аланы абадан тёлюсюню юсюнден айтханда, сынамлы, кеслери заманында уллу жетишимле болдургъан спортчула, бюгюнлюкде уа тренерле асламдыла. Жаш кадрла да жетишедиле – бу жаны бла чурум жокъду. Жашау тюрлене, айный баргъаныча, спортну хар тюрлюсюнде да жангычылыкъла этиледиле, жаш тренерле да сабийлени жарауларын алагъа кёре къурайдыла. 2020 жылда боксдан регион федерациябызгъа Нажмудин Бербеков башчылыкъ этип башлагъанды да, ол боксну айнытыугъа кертиси бла да къайгъырады, инвентарь алады, аны да даражалы фирмаладан багъалысын, игисин. Элледе секцияла къураладыла, сёз ючюн, кёп болмай Терк районда, Нартанда, Прохладнада залла ишлеп тебирегендиле, битеу да 32 залдан аслам ачылгъанды, алада юйрениу хакъсызды.

- Республикада Олимпиада боксдан школланы саны къаллай бирди, алада ненча адам жарау этеди?

- Боксну бу тюрлюсюнден Олимпиада резервли юч школ барды – экиси Нальчикде, бири да Тырныауузда, алада 720-750 адам юйренедиле.

- Даниял, сени кесинги да залынг барды, аны юсюнден толуракъ айтсанг эди.

- Залны 2018 жылны ноябринде ачханма, аны аты былайды «Boxing.life», анда кесим юйретеме. Менде жарау этгенлени араларында умутландыргъан спортчула кёпдюле, ала республика, округ даражада хорлайдыла, Россейни чемпионатларында, башха магъаналы турнирледе кеслерин сынайдыла.

- Сизге боксха юйренирге хар сюйген адам келаллыкъмыды огъесе эришиуледе хорларгъа боллукъ умутландыргъан спорчтуланымы юйретесиз?

- Хар сюйген да. Бусагъатда бизде тюрлю-тюрлю жыл санда 79 адам юйренедиле. Саулукъларын, къарыуларын кючлерге сюйюп келгенле да иги кесекдиле. Алай турнирлеге къатышыргъа излемейбиз, кесибиз ючюн юйренебиз дегенлени араларында артда, сейирлери къозгъалып,  эришиулеге барыргъа сюебиз дегенле да чыгъадыла. Сермешлеге къатышыргъа излейбиз деп кеслерине борч салып келгенле да бардыла. Юлгюге, бусагъатда бизде ММА-да эришген Къартлыкъланы Ислам бешинчи сермешине хазырлана турады, ол эндиге дери ётдюрген  тёрт  эришиуюнде хорлагъанды.

Манга, тренергеча, эм магъаналысы юйренирге келген адамдан олимпиец этиу тюйюлдю. Мен излеген – алада эм алгъа адамлыкъ шартланы ачыкълауду эм айнытыуду. Сабийлени мектепледе окъутхан битеу устазла эм директорла бла байламлыкъда турама, аны школда халисин, къалай окъугъанын сурайма. Бир тюрлю кемчиликни юсюнден билсем, жарауда аны тюзетирча мадар этеме.

- Бир-бирде ата-анала сабийлерин жараугъа зор бла келтиредиле, сен анга къалай къарайса? Сора, профессионал бокс бла толу жарау этип 18 жылда башларгъа жарай эсе, спортну бу тюрлюсюн алгъадан сюйген адам не бла кюрешсин?

- Алгъа экинчи соруугъа жууап берейим, сабийлеге эм игиси жюзюу бла гимнастикады. Жюзюу адамны чархыны хар мышцасын ишлетеди, жюрекге, ёпкелеге игиди, ол эм иги физкультура болгъаны жашырын тюйюлдю. Гимнастикада санларын создуруу уа артда жараулада болушурукъду.

Ата-аналагъа уа айтырыгъым а, сабийни спортну кеслери жаратхан тюрлюлерине зор бла келтирмей, алгъа башха-башха заллагъа элтселе игиди. Абаданла кеслери жеталмагъан умутларын гитчеледе толтурургъа керек тюйюлдюле. Сабий спортну талай тюрлюсюн кёрюп, кёлю жаратханны кеси сайлап жюрюсе – ол тюздю.

- Бизни республикада тиширыу бокс нек жокъду?

- Мени танышларымы араларында жетишимли боксчу-тиширыула бардыла. Алай къызлагъа быллай спорт неге керекди. Тиширыу субай, ариу, огъурлу болургъа керекди, мында уа 90 процентде адамны башына-бетине ураса. Сора тюйюшген тиширыуда не назиклик къаллыкъды? Мен аны арталлыда жаратмайма. Гимнастика, теннис эм башха жаны бла юйренселе боллукъду, деп оюмум алайды.

Ансы къызла да келедиле залгъа юйренирге сюебиз деп, биз аланы жараулагъа алмайбыз.

- Ушагъыбызны ахырында – спортну жаш тёлюню ариу юйретиуде кючю.

- Хар заманда да спорт жаш тёлюню ариу ниетлеге, тюз иннетге, Ата журтха сюймекликге юйретиуде уллу жерни алгъанды. Ол адамны кесини, башха адамланы, туугъан жерни аллында жууаплылыкъгъа, низамгъа юйретеди - аны ючюн къайсы къыралда да аны айнытыугъа аслам эс бёлюнеди.