Къагъыт огъесе электрон документми?

«Роскадастрны» республикада бёлюмюнде фатарны неда юйню юсюнден выписканы къалай алыргъа боллугъуну, аны болжалларыны, къагъыт документни электрон тюрлюсюнден башхалыгъыны юсюнден айтхандыла. 
Алай бла выписка – ол адамны фатаргъа неда журтха ие болгъанына шагъатлыкъ этген документди, сатыу-алыу бардыргъанда изленеди. Ол объектге борчла болгъанларын бла къалгъанларын кёргюзтюрюкдю, ансыз инсанны ие этерик тюйюлдюле, ипотека алыргъа неда приватизация этерге жарарыкъ тюйюлдю. «Роскадастр» выпискаланы 20 тюрлюсюн береди, 2023 жылны жангызда биринчи юч айында 448 минг къагъыт жарашдырылгъанды. Ол а адамла бла организацияла быллай къырал жумушла бла аслам хайырланнганларын кёргюзтеди. 

Выписканы быллай амалла бла алыргъа жарайды: МФЦ-лада, Росреестрни официал сайтында, къырал жумушланы порталында неда «Роскадастргъа» приёмгъа барып. Къагъыт неда электрон документ керек болгъанына кёре, инсан къайсы амал келишгенин кеси сайлайды. Сора, МФЦ-да выписканы юч ишчи кюнню ичинде берлик эселе, «Роскадастрда» - баргъан кюнюнде. Росреестрни сайтында бла къырал жумушланы порталында аны электрон халда къырал пошлина тёленнгенден сора хазырларыкъдыла, деп ангылатады «Роскадастрны» регионда районла аралы бёлюмюню таматасы Светлана Тамазова.

Къагъыт эм электрон документлени юридический жаны бла кючлери бирчады, алай биринчисине къол специалист кеси, ызы бла организация мухур саладыла, экинчисине уа къол электрон амал бла салынады. Электрон документни алыргъа тынчды, аны ючюн бир жары барыргъа керек тюйюлдю, ол тас да болмайды. Къагъыт документни алыр ючюн, офисге барыргъа, азындан эки кюн да сакъларгъа, пошлинаны эм специалист объектге келгенин да тёлерге тюшерикди. Аны тас этерге боллукъду, башха документлени ичинде тапхан да тынч тюйюлдю. Сора, электрон документлени керекли жерге Интернет бла кёргюзтюрге жарарыкъды, къагъытдагъыланы элтип берирге неда почта бла, курьер бла жиберирге керекди, дейдиле «Роскадастрда».

Кульчаланы Зульфия.
Поделиться: