Нальчикде сабий чыгъармачылыкъны  «Кюн шахар» арасында окъуучула жайда солурча кёп профильли лагерь къуралгъанды. Анда солугъанланы арасында ачыгъанла болмазча МЧС-ни регион бёлюмюню келечилери республиканы от тюшюуге къажау службасыны эм ГИБДД-ны ишчилери бла бирге профилактика жумушланы тамамлагъандыла.

Ала сабийлеге орамда жюрюгенде, агъачда неда сууланы тийрелеринде болгъанда къыйын болум чыкъгъанда кеслерин къалай жюрютюрге керек болгъанларын ангылатхандыла. От тюшюуге къоркъуусузлукъну жорукъларын, болушлукъ этиу службаланы телефонларын эсгертгендиле. От тюшюуге къажау службаны къошакъ усталыкъ билим бериу арасыны устазы Ахайланы Виктория ачыгъаннга биринчи медицина болушлукъ къалай этилгенин кёргюзтгенди. Гитчеле чып тюшгенни халына къараргъа, сыннганы неда жарасы болгъанын ангыларгъа, байлау салыргъа юйреннгендиле.  Ала жоллада ачымазча, къонакъла жолда жюрюуню жорукъларын да айтхандыла, тюрлю-тюрлю болумланы кёргюзтгендиле, сабийле уа аладан къутулууну амалларын излегендиле. Къоркъуусузлукъну дерси ушакъ халда ётгенди.

Арбазда уа аланы 2-чи номерли от ёчюлтюу-къутхарыу бёлюмню къарауулу сакълагъанды, от ёчюлтюучюле гитчелеге машиналарын, отну ёчюлтген оборудованияларын кёргюзтгендиле. Сабийле техникагъа сейир этип къарагъандыла, къутхарыучуланы кийимлерин кийип да кёргендиле.

Жай солууну кезиуюнде быллай профилактика ишлени магъанасы бютюнда ёседи. Аланы кезиулеринде сабийле турмушда, табийгъатда, башха жашау болумлада да къоркъуусуз жашау бардырыргъа юйренедиле.