Жигитлик, жандауурлукъ да излеген усталыкъ

Саулукълу жашау бардырыуну, спорт бла дайым кюрешиуню магъанасы уллуду. Бютюнда сен къутхарыучу эсенг. Мисирланы Тимур Россейни МЧС-ини регионда управлениясыны экинчи номерли от ёчюлтюу-къутхарыу бёлюмюнде ишлейди, ич службаны сержантыды.

От тюшюуге къажау-къутхарыу спортха отну ёчюлтюуде хайырланылгъан приёмла киредиле. Анда къарыулу, терк болургъа керекди, чыныгъыулукъ изленеди. Эришиуле керти да къыйын болумгъа ушатылып къураладыла. Спортчугъа чурумлары болгъан жерни мычымай ётерге, энчи снаряженияны жаяргъа, юйретиуле бардырылгъан мекямгъа ёрлерге керекди. Аны барысына да аз заман бериледи, халат жиберирге жарамайды. Адамланы жашауларына къоркъуу болгъан кезиуде хар такъыйкъа магъаналыды. 

- Къутхарыучуну ишин акъылбалыкъ болмагъан заманымда окъуна жаратхан эдим, 2004 жылда. Андан бери жараусуз бир кюнюм ётгенди деп, эсимде жокъду. Тири жашау бардырыу баш жоругъумду,  ол дайым хазырлылыкъда турургъа, жангы жетишимлеге итинирге болушады, - дейди Тимур.

От тюшюуге къажау-къутхарыу спортну устасы деген ат Мисир улугъа 2015 жылда берилгенди, ол кёп кере республикалы эм регионла аралы эришиуледе хорлагъанды. Экинчи бёлюмде къутхарыучу 2016 жылдан бери урунады, ишден бош заманында спорт бла кюрешеди, тенглерини алларында намысы жюрюйдю. «Коллективде хал иги эсе, салыннган борчла да ахшы тамамланадыла. От тюшген жерге баргъанда, биз бир бирибизге базыналлыкъбыз. Ишими бек сюеме, от ёчюлтюучю жигит, ётгюр адам болургъа тийишлиди», - дейди Тимур.