Тыш къыраллагъа солургъа барама дегенлени эслерине

Хауасы исси, мылылы болгъан къыраллагъа (Африка, Къыбыла Америка, Азия тийреле) солургъа барыргъа сюйгенле аллай жерледе жукъгъан эмда паразит ауруула кенг жайылгъанларын эсде тутаргъа керекдиле. Быллай инфекцияла адамны саулугъуна, ол санда бегирек да аш орунуна, чегилерине, кёзлерине эмда терисине нечик уллу хата салыргъа боллугъуну юсюнден КъМР-де Гигиена эмда эпидемиология араны специалистлери билдиредиле.

Алай бла инфекцияла бла паразитле асламысында суу, тазаланмагъан аш-азыкъла эмда къурт-къумурсхаланы къапханы бла кёчедиле сау адамгъа. Дагъыда алагъа ауругъаннга неда кир затлагъа тийгенде да жугъаргъа боллукъду. Аны себепли быллай къыраллагъа солургъа барама дегенле алада болумну юсюнден аллындан окъуна туроператоргъа сёлешип билирге керекдиле.

Къалай-алай болса да, кесигизни сакъларгъа кереклисин да унутургъа жарамайды. Аны ючюн аш ашарны аллында къолларыгъызны сапын бла бир ненча кере жууаргъа, кёгетлени бла жемишлени да исси суу бла тынгылы жуууп тазаларгъа керекди. Бир амал бар эсе ашны, бютюнда бег а чабакъны, отда хазырланнган тюрлюлерин хайырланыгъыз. Сууну жаланда къайнатылгъандан сора ичигиз неда тюкенледе шешалада сатылгъанын алыгъыз. Билмеген ашны ашамагъыз, аланы къолдан сатып алмагъыз, адамла сыйлагъан затланы да татыуун кёрмегиз. Бассейнледе неда кёлледе жуууннганыгъызда сууну жутмазгъа кюрешигиз. Къурт-къумурсхаланы юркютюрча энчи средстволаны хайырланыгъыз (репеллентле бла инсектицидле), тургъан отоуларыгъызда уа терезелени бла эшиклени аула бла жабыгъыз.

Баш жорукъладан бири - туристлени жумушларына къарагъан гидни айтханындан чыкъмагъыз! Ауруу къозгъалгъанны бир тюрлю ышанын, ол санда юсюгюз къызып, ичигиз аман этип, теригизде къотурла чыгъып башлагъанын,  дагъыда къурт-къумурсха къапханын эслесегиз, олсагъат окъуна врачха барыгъыз.